ប្រទេសចិនបានអំពាវនាវឲ្យមានគំរូថ្មីមួយ សម្រាប់ការពាក់ព័ន្ធរបស់ខ្លួនជាមួយសហរដ្ឋអាមេរិក ដោយប្រឹងប្រែងធ្វើឲ្យកាន់តែល្អប្រសើរឡើងក្នុងទំនាក់ទំនងដែលទើបបានថយកម្ដៅនាពេលថ្មីៗនេះ ជាមួយរដ្ឋបាលរបស់លោកប្រធានាធិបតី Donald Trump ខណៈពេលដែលបន្តឹងខ្សែបន្ទាត់ក្រហមរបស់ខ្លួន ជុំវិញបញ្ហាកោះតៃវ៉ាន់។

ក្នុងសន្ទរកថាមួយនៅឯសន្និសីទ ស្តីពីទំនាក់ទំនងការបរទេស នៅថ្ងៃអង្គារ (ទី៣០ ខែធ្នូ) នេះ រដ្ឋមន្ត្រីការបរទេសចិន លោក Wang Yi បានលើកឡើងថា៖ «យើងនឹងលើកកម្ពស់ការអភិវឌ្ឍប្រកបដោយភាពល្អប្រសើរ ស្ថិរភាព និងនិរន្តរភាពនៃទំនាក់ទំនងចិន-អាមេរិក»។ លោកបានបន្ថែមថា ប្រទេសចិននឹងបន្តចូលរួមជាមួយសហរដ្ឋអាមេរិក ដោយផ្អែកលើការគោរពគ្នាទៅវិញទៅមក ប៉ុន្តែនឹងមិន «ព្រមប្រគល់ឲ្យជាដាច់ខាតសូម្បីមួយអ៊ីញ» ពាក់ព័ន្ធនឹងផលប្រយោជន៍ស្នូលរបស់ជាតិ។

អ្នកការទូតជាន់ខ្ពស់របស់ប្រទេសចិន បានស្នើជាពិសេសនូវ «គំរូថ្មីនៃអន្តរកម្មវិជ្ជមាន» ជាមួយទីក្រុងវ៉ាស៊ីនតោន ទោះបីជារូបលោកបានរំលឹកឡើងវិញនូវការប្រឆាំងរបស់ទីក្រុងប៉េកាំង ចំពោះការលក់អាវុធរបស់សហរដ្ឋអាមេរិកទៅឲ្យកោះតៃវ៉ាន់ក៏ដោយ។ ជាមួយគ្នានេះ លោក Wang ក៏បានបញ្ជាក់ម្តងទៀតនូវជំហររាប់ទសសត្សរ៍របស់បក្សកុម្មុយនីស្តដែលកំពុងកាន់អំណាចថា «ការបង្រួបបង្រួមកោះតៃវ៉ាន់» គឺជាបេសកកម្មដែលត្រូវតែសម្រេចបាន។

គួរបញ្ជាក់ថា ការកត់សម្គាល់របស់លោក Wang នេះ បានកើតមានឡើង ស្របពេលដែលប្រទេសចិនធ្វើសមយុទ្ធបាញ់គ្រាប់ពិតដ៏ធំបំផុតមួយ នៅជុំវិញកោះតៃវ៉ាន់ ក្នុងសប្តាហ៍នេះ ពោលគឺត្រឹមតែប៉ុន្មានថ្ងៃបន្ទាប់ពីទីក្រុងវ៉ាស៊ីនតោន បានប្រកាសនូវកញ្ចប់លក់អាវុធដ៏ធំបំផុតមួយមិនធ្លាប់មានឲ្យកោះស្វ័យគ្រប់គ្រងប្រកាន់លទ្ធិប្រជាធិបតេយ្យ៕