អង្គភាពប្រដាប់អាវុធរបស់ក្រុមហាម៉ាស កាលពីថ្ងៃចន្ទ (ទី២៩ ខែធ្នូ) បានអះអាងជាថ្មីថា ខ្លួននឹងមិនព្រមបោះបង់អាវុធរបស់ខ្លួនឡើយ ដោយនេះជាបញ្ហាដ៏សំខាន់ដែលត្រូវបានរំពឹងថា នឹងមាននៅក្នុងកិច្ចពិភាក្សា រវាងប្រធានាធិបតីអាមេរិក លោក Donald Trump និងនាយករដ្ឋមន្ត្រីអ៊ីស្រាអែល លោក Benjamin Netanyahu។

អ្នកនាំពាក្យថ្មីរបស់កងពលតូច Ezzedine al-Qassam ដែលបានយកឈ្មោះតាមអ្នកស្នងតំណែងមុន លោក Abu Obeida បានឲ្យដឹងនៅក្នុងសេចក្តីថ្លែងការណ៍វីដេអូមួយថា៖ «ប្រជាជនរបស់យើងកំពុងការពារខ្លួន ហើយនឹងមិនបោះបង់ចោលអាវុធរបស់ពួកគេជាដាច់ខាត ដរាបណាការកាន់កាប់នៅតែមានដដែល»។

លោក Trump ត្រូវបានគេរំពឹងថា នឹងជំរុញឲ្យមានវឌ្ឍនភាពនៅក្នុងបទឈប់បាញ់ នៅតំបន់ហ្កាហ្សា នៅពេលដែលលោកជួបជាមួយលោក Netanyahu នៅថ្ងៃចន្ទ សម្រាប់កិច្ចពិភាក្សាដែលនឹងរួមបញ្ចូលផងដែរនូវក្ដីបារម្ភរបស់អ៊ីស្រាអែល ពាក់ព័ន្ធនឹងក្រុមហេសបូឡា នៅប្រទេសលីបង់ និងបញ្ហាអ៊ីរ៉ង់។

រដ្ឋាភិបាលទីក្រុងវ៉ាស៊ីនតោន បានសម្របសម្រួលឲ្យមានបទឈប់បាញ់ នៅសមរភូមិជួរមុខទាំង៣ ប៉ុន្តែអ៊ីស្រាអែល មានការប្រុងប្រយ័ត្ន ដោយខ្លាចថា គូសត្រូវរបស់ខ្លួនអាចកសាងកងកម្លាំងឡើងវិញ បន្ទាប់ពីពួកគេត្រូវបានធ្វើចុះខ្សោយយ៉ាងខ្លាំង នៅក្នុងសង្រ្គាមនេះ។

សម្រាប់តំបន់ហ្កាហ្សា អ៊ីស្រាអែល និងក្រុមហាម៉ាស បានព្រមព្រៀងគ្នា កាលពីខែតុលា ចំពោះផែនការរបស់លោក Trump ដើម្បីបញ្ចប់សង្រ្គាម ដែលទីបំផុតឃើញអ៊ីស្រាអែលត្រូវដកកម្លាំងចេញពីតំបន់ហ្កាហ្សា ហើយក្រុមហាម៉ាសត្រូវរំសាយអាវុធ និងបោះបង់តួនាទីគ្រប់គ្រង នៅក្នុងដែនដីនេះ៕