ការតវ៉ា និងកូដកម្មនៅក្នុងប្រទេសអ៊ីរ៉ង់ជុំវិញអតិផរណា និងការធ្លាក់ចុះតម្លៃរូបិយប័ណ្ណបានរីករាលដាលពីរដ្ឋធានីតេអេរ៉ង់ ទៅកាន់ទីក្រុងជាច្រើនទៀតនៅថ្ងៃទីបីនៃភាពចលាចល។ 

ការតវ៉ាបានចាប់ផ្តើមកាលពីថ្ងៃអាទិត្យ បន្ទាប់ពីបណ្ដាក្រុមអាជីវករនៅ Grand Bazaar នៃទីក្រុងតេអេរ៉ង់បានធ្វើកូដកម្ម នៅពេលប្រាក់រីអាល់ (rial) អ៊ីរ៉ង់ធ្លាក់ចុះដល់កម្រិតទាបបំផុតធៀបនឹងប្រាក់ដុល្លារអាមេរិកនៅលើទីផ្សារបើកចំហ។ 

ចាប់តាំងពីពេលនោះមក វីដេអូដែលបានផ្ទៀងផ្ទាត់ដោយទូរទស្សន៍ BBC ជាភាសាអារ៉ាប់ បានបង្ហាញពីបាតុកម្មនៅក្នុងទីក្រុង Karaj, Hamedan, Qeshm, Malard, Isfahan, Kermanshah, Shiraz និងទីក្រុង Yazd។ នគរបាលក៏ត្រូវបានគេមើលឃើញប្រើឧស្ម័នបង្ហូរទឹកភ្នែកក្នុងការប៉ុនប៉ងបំបែកក្រុមបាតុករផងដែរ។

រដ្ឋាភិបាលអ៊ីរ៉ង់បាននិយាយថា ខ្លួនទទួលស្គាល់ការតវ៉ា ហើយនឹងស្តាប់ដោយអត់ធ្មត់ ទោះបីជាត្រូវប្រឈមនឹងសំឡេងដ៏គ្រោតគ្រាតក៏ដោយ។

លោកប្រធានាធិបតី Masoud Pezeshkian បានសរសេរនៅលើបណ្ដាញសង្គម X កាលពីថ្ងៃចន្ទដើមសប្ដាហ៍នេះថា លោកបានណែនាំរដ្ឋមន្ត្រីក្រសួងមហាផ្ទៃឱ្យធ្វើកិច្ចចរចាជាមួយអ្វីដែលលោកបានហៅថាជា អ្នកតំណាង របស់ក្រុមបាតុករ ដើម្បីដោះស្រាយបញ្ហា និងធ្វើសកម្មភាពដោយមានការទទួលខុសត្រូវ៕