នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយកាលពីថ្ងៃអង្គារ ៣០ ខែធ្នូសប្ដាហ៍នេះ ថា លោកប្រធានាធិបតី Trump ពុំបានបង្ហាញការសង្ស័យចំពោះលោកជាឯកជនអំពីការវាយប្រហាររបស់អ៊ីស្រាអែលលើតំបន់ហ្កាហ្សាបន្ទាប់ពីការប្រកាសបទឈប់បាញ់ដែលក្រសួងសុខាភិបាលហ្កាហ្សានិយាយថា បានសម្លាប់ជនជាតិប៉ាឡេស្ទីនជាង៤០០ នាក់ភាគច្រើនជាជនស៊ីវិលនោះទេ។    

លោក Netanyahu ដែលបានជួបជាមួយលោក Trump កាលពីថ្ងៃចន្ទ ២៩ ខែធ្នូសប្ដាហ៍នេះដែរ បានធ្វើអត្ថាធិប្បាយក្នុងអំឡុងពេលសម្ភាសន៍ជាមួយអ្នកសម្របសម្រួលកម្មវិធីព័ត៌មាន Fox News លោក Bret Baier ខណៈកំពុងបំពេញទស្សនកិច្ចនៅសហរដ្ឋអាមេរិក។

ទាហានអ៊ីស្រាអែលបីនាក់ក៏ត្រូវបានសម្លាប់បន្ទាប់ពីបទឈប់បាញ់ក្នុងខែតុលាផងដែរ។

លោក Netanyahu បាននិយាយថា លោក និងលោក Trump យល់ឃើញស្របគ្នា លើតម្រូវការសម្រាប់ក្រុមសកម្មប្រយុទ្ធប៉ាឡេស្ទីន ហាម៉ាស ក្នុងការរំសាយអាវុធ ហើយបាននិយាយថា លោកបានមើលឃើញអនាគតខុសៗគ្នាសម្រាប់តំបន់ហ្កាហ្សា។

លោក Netanyahu បានបញ្ជាក់ម្តងទៀតនូវសេចក្តីថ្លែងការណ៍មុនៗថា អ៊ីស្រាអែលពុំស្វែងរកការកើនឡើងភាពតានតឹងជាមួយអ៊ីរ៉ង់ ដែលបានប្រយុទ្ធគ្នាក្នុងសង្គ្រាមរយៈពេល១២ ថ្ងៃជាមួយអ៊ីស្រាអែលក្នុងខែមិថុនា នោះទេ ប៉ុន្តែបានបង្កើនការព្រួយបារម្ភអំពីអ្វីដែលលោកនិយាយថាជាសមយុទ្ធមីស៊ីលផ្លោងរបស់អ៊ីរ៉ង់៕