បណ្ដារដ្ឋមន្ត្រីការបរទេសអន្តរជាតិ មកពីប្រទេសចំនួន១០ កាលពីថ្ងៃអង្គារ (៣០ ធ្នូ) បានសម្តែង «ការព្រួយបារម្ភយ៉ាងធ្ងន់ធ្ងរ» អំពី «ការធ្លាក់ចុះនៃស្ថានភាពមនុស្សធម៌ឡើងវិញ» នៅក្នុងតំបន់ហ្កាហ្សា ដោយនិយាយថា ស្ថានភាពនេះគឺជា «គ្រោះមហន្តរាយ»។

នៅក្នុងសេចក្តីថ្លែងការណ៍រួមមួយដែលចេញផ្សាយដោយក្រសួងការបរទេសអង់គ្លេស បានឱ្យដឹងថា បណ្ដារដ្ឋមន្ត្រីនៃចក្រភពអង់គ្លេស កាណាដា ដាណឺម៉ាក ហ្វាំងឡង់ បារាំង អ៊ីស្លង់ ជប៉ុន ន័រវែស ស៊ុយអែត និងស្វីស បាននិយាយថា «នៅពេលដែលរដូវរងាចូលមកដល់ ជនស៊ីវិលនៅហ្កាហ្សា កំពុងប្រឈមនឹងស្ថានភាពដ៏គួរឱ្យភ័យខ្លាច ដោយមានភ្លៀងធ្លាក់ខ្លាំង និងសីតុណ្ហភាពធ្លាក់ចុះ»។

សេចក្តីថ្លែងការណ៍បានបន្ថែមថា៖ «មនុស្ស ១,៣ លាននាក់ នៅតែត្រូវការការគាំទ្រផ្នែកទីជម្រកជាបន្ទាន់ ហើយជាងពាក់កណ្តាលនៃមណ្ឌលសុខភាពនៅដែនដីនោះ ដំណើរការបានតែមួយផ្នែកប៉ុណ្ណោះ ហើយប្រឈមនឹងកង្វះខាតឧបករណ៍ និងសម្ភារៈវេជ្ជសាស្ត្រសំខាន់ៗ។ ការដួលរលំទាំងស្រុងនៃហេដ្ឋារចនាសម្ព័ន្ធអនាម័យ បានធ្វើឱ្យមនុស្ស ៧៤ម៉ឺននាក់ ងាយរងគ្រោះដោយទឹកជំនន់មានជាតិពុល»។

ការព្រមាននេះបានកើតឡើងរយៈពេលមួយថ្ងៃប៉ុណ្ណោះ បន្ទាប់ពីប្រធានាធិបតីអាមេរិក លោក Donald Trump បានព្រមានក្រុមសកម្មប្រយុទ្ធប៉ាឡេស្ទីនហាម៉ាសថា ពួកគេនឹង «ជួបផលអាក្រក់យ៉ាងធ្ងន់ធ្ងរ» ប្រសិនបើមិនព្រមរំសាយអាវុធនៅក្នុងតំបន់ហ្កាហ្សាទេនោះ នៅក្នុងការបង្ហាញជំហររួមគ្នាជាមួយនាយករដ្ឋមន្ត្រីអ៊ីស្រាអែល Benjamin Netanyahu និងសញ្ញាបង្ហាញពីភាពតានតឹងជាថ្មី៕