ប្រជាជនសូម៉ាលី រាប់ពាន់នាក់ បាននាំគ្នាចេញបាតុកម្មតាមដងផ្លូវទូទាំងប្រទេស កាលពីថ្ងៃអង្គារ (៣០ ធ្នូ) ដើម្បីតវ៉ាប្រឆាំងនឹងការសម្រេចចិត្តរបស់អ៊ីស្រាអែល ក្នុងការទទួលស្គាល់ដែនដី សូម៉ាលីលែន (Somaliland) ដែលជាតំបន់បំបែកខ្លួននៅភាគខាងជើងប្រទេសសូម៉ាលី ដោយហៅសកម្មភាពនេះថា ជាការរំលោភលើអធិបតេយ្យភាពជាតិ និងច្បាប់អន្តរជាតិ។

ហ្វូងមនុស្សដ៏យ៉ាងច្រើនបានប្រមូលផ្តុំគ្នាក្នុងទីតាំងនានាទូទាំងប្រទេសសូម៉ាលី រួមទាំងទីក្រុង Baaydhabo ទីក្រុង Hobyo ទីក្រុង Xudur ទីក្រុង Guriceel និងទីក្រុង Laascaanood ដោយក្រុមបាតុករបានគ្រវីទង់ជាតិសូម៉ាលី ស្រែកពាក្យស្លោករួបរួមជាតិ និងកាន់បដាបដិសេធការទទួលស្គាល់របស់អ៊ីស្រាអែល លើដែនដីនោះ។

គួរឱ្យដឹងថា Somaliland បានដំណើរការជាតំបន់ស្វយ័តតាមជាក់ស្តែង ចាប់តាំងពីប្រកាសឯករាជ្យនៅឆ្នាំ១៩៩១មក ប៉ុន្តែមិនដែលមានការទទួលស្គាល់ពីអន្តរជាតិឡើយ។ អ៊ីស្រាអែលគឺជាប្រទេសទីមួយហើយ ដែលទទួលស្គាល់ដែនដីនេះថាជារដ្ឋឯករាជ្យ។ ក្រុមអ្នកតវ៉ានិយាយថា ការសម្រេចចិត្តនេះ ធ្វើឱ្យប៉ះពាល់បូរណភាពទឹកដីសូម៉ាលី និងបង្កើតគំរូដ៏គ្រោះថ្នាក់មួយសម្រាប់ការជ្រៀតជ្រែកពីបរទេស។

ក្នុងរដ្ឋធានីម៉ូហ្កាឌីស៊ូ មនុស្សរាប់រយនាក់បានប្រមូលផ្តុំគ្នានៅពហុកីឡដ្ឋានម៉ូហ្គាឌីស៊ូ ក្នុងការតវ៉ាទ្រង់ទ្រាយធំមួយ ដែលប្រមូលផ្តុំមនុស្សមកពីគ្រប់មជ្ឈដ្ឋាន។ ហ្វូងបាតុករបានចោទប្រកាន់អ៊ីស្រាអែល ថាបង្កអស្ថិរភាពដល់សូម៉ាលី ហើយបានទាញយកភាពស្រដៀងគ្នាជាមួយនឹងសកម្មភាពរបស់អ៊ីស្រាអែល លើប្រជាជនប៉ាឡេស្ទីន៕