ប្រធានាធិបតីអ៊ុយក្រែន លោក Volodymyr Zelenskyy កាលពីថ្ងៃអង្គារ (៣០ ធ្នូ) បានបញ្ជាក់ឡើងវិញជាថ្មីម្ដងទៀតថា រូបលោកត្រៀមខ្លួនរួចជាស្រេចហើយ ដើម្បីជួបជាមួយតំណាងរុស្ស៊ី រួមទាំងលោកប្រធានាធិបតីរុស្ស៊ី Vladimir Putin ផងដែរ ទោះក្នុងទម្រង់ណាក៏ដោយ ប៉ុន្តែបានសង្កត់ធ្ងន់ថា ពាក្យសម្ដីរបស់មេដឹកនាំវិមានក្រឹមឡាំងរូបនេះ ត្រូវតែដូចគ្នាទៅនឹងសកម្មភាពរបស់លោក ជាមុនសិន។

គួររម្លឹកថា លោក Zelensky និងលោក Putin បានសន្ទនាជាមួយគ្នាដោយផ្ទាល់តាមទូរសព្ទចុងក្រោយបំផុត គឺនៅថ្ងៃទី២៦ ខែកក្កដា ឆ្នាំ២០២០ តាមគំនិតផ្តួចផ្តើមរបស់អ៊ុយក្រែន។ ថ្លែងប្រាប់អ្នកយកព័ត៌មាន លោក Zelenskyy បាននិយាយថា «ស្ដាប់ទៅដូចចម្លែកបន្តិច ហើយរូបលោកនិយាយរឿងនេះប្រាប់ដោយផ្ទាល់ទៅកាន់ប្រធានាធិបតីអាមេរិករួចហើយ» ដោយសំដៅលើកិច្ចពិភាក្សាជាមួយលោកប្រធានាធិបតី Donald Trump កាលពីថ្ងៃទី២៩ ខែធ្នូ។

លោក Zelenskyy បន្តថា «នៅជ្រុងម្ខាង លោក Putin ប្រាប់លោក Trump ថា លោកចង់បញ្ចប់សង្គ្រាម ហើយថា នេះជាបំណងរបស់លោក ប៉ុន្តែនៅជ្រុងម្ខាងទៀត លោក Putin បែរជាទំនាក់ទំនងទាំងបើកចំហតាមប្រព័ន្ធផ្សព្វផ្សាយថា លោកត្រៀមខ្លួនជាស្រេចនិងមានឆន្ទៈក្នុងការបន្តសង្គ្រាម ដោយប្រើមីស៊ីលវាយប្រហារអ៊ុយក្រែន សាទរការបំផ្លិចបំផ្លាញហេដ្ឋារចនាសម្ព័ន្ធស៊ីវិល និងចេញបញ្ជាដល់ឧត្តមសេនីយ៍របស់លោកអំពីទីតាំងដែលរុលទៅមុខ និងអ្វីដែលត្រូវដណ្តើមយក»។

មេដឹកនាំអ៊ុយក្រែនរូបនេះសង្កត់ធ្ងន់ថា រូបលោកបានប្រាប់លោក Trump ថា សកម្មភាពរបស់លោក Putin គឺផ្ទុយនឹង «វោហាសាស្ត្រសន្តិភាព» ដែលលោកបានប្រើ ក្នុងកិច្ចសន្ទនាជាមួយប្រធានាធិបតីអាមេរិក។ យ៉ាងណាក៏ដោយ លោក Zelenskyy បន្តថា៖ ជាថ្មីម្តងទៀត មធ្យោបាយជួបគ្នានិងក្នុងទម្រង់បែបណានោះ មិនមែនជាបញ្ហាសម្រាប់អ៊ុយក្រែនទេ ព្រោះទីក្រុងគីវត្រៀមខ្លួនរួចរាល់ហើយ អ្វីដែលសំខាន់ គឺពាក្យសម្ដី និងសកម្មភាពរបស់មេដឹកនាំរុស្ស៊ី ត្រូវតែស្របគ្នា៕