ជនស៊ីវិលភៀសខ្លួនរាប់រយនាក់ បានរត់ភៀសពីភូមិនានានៅជិតទីក្រុង Uvira កាលពីថ្ងៃអង្គារ ទី៣០ ខែធ្នូ ដោយដឹករបស់របរនិងនាំយកសត្វពាហនៈ ខណៈការប្រយុទ្ធគ្នាបានបន្តរវាងកងកម្លាំងប្រដាប់អាវុធកុងហ្គោ និងក្រុមឧទ្ទាមM23 ទោះបីជាក្រុមនេះបានប្រកាសពីការដកកងទ័ពចេញពីទីក្រុងភាគខាងកើតក៏ដោយ។

កងកម្លាំងប្រដាប់អាវុធនៃសាធារណរដ្ឋប្រជាធិបតេយ្យកុងហ្គោ បាននិយាយថា ពួកគេបានដណ្តើមយកការគ្រប់គ្រងតំបន់ Kigongo, Katongo និងតំបន់ Luanga បន្ទាប់ពីការប៉ះទង្គិចគ្នាយ៉ាងខ្លាំងជាមួយក្រុមអ្នកប្រយុទ្ធ M23 មានចម្ងាយប្រហែល១៥គីឡូម៉ែត្រពីទីក្រុង Uvira។

ក្រុមគ្រួសារមកពីតំបន់ Kigongo, Katongo និងតំបន់ Kalungwe អាចត្រូវបានគេមើលឃើញចូលទៅក្នុងទីក្រុងUvira។

ការភៀសខ្លួននេះ បានបន្ថែមទៅលើវិបត្តិមនុស្សធម៌កាន់តែអាក្រក់នៅភាគខាងកើតប្រទេសកុងហ្គោ ជាកន្លែងដែលក្រុមឧទ្ទាម M23 បានដណ្តើមយកទឹកដីដ៏សំខាន់ក្នុងរយៈពេលប៉ុន្មានឆ្នាំចុងក្រោយនេះ ដោយបង្ខំឱ្យមនុស្សរាប់រយរាប់ពាន់នាក់ ចាកចេញពីលំនៅឋានរបស់ពួកគេ។