អ្នកជំនាញខាងដែនសមុទ្រ និងអង្គការអន្តរជាតិ បានលើកឡើងថា ការប្រកួតប្រជែងភូមិសាស្ត្រនយោបាយ និងជម្លោះប្រដាប់អាវុធ បានធ្វើឲ្យមានភាពតានតឹងកាន់តែខ្លាំងឡើងៗ ចំពោះសណ្តាប់ធ្នាប់ដែនសមុទ្រសកល ក្នុងឆ្នាំ២០២៥ ដោយរំខានដល់ផ្លូវដឹកជញ្ជូនសំខាន់ៗ ធ្វើឲ្យការចំណាយថ្លៃដើមឡើងខ្ពស់ និងកែប្រែគំរូពាណិជ្ជ។

នៅក្នុងរបាយការណ៍ត្រួតពិនិត្យការដឹកជញ្ជូនតាមផ្លូវសមុទ្រឆ្នាំ២០២៥ របស់ខ្លួន ស្ថាប័នពាណិជ្ជកម្ម និងអភិវឌ្ឍន៍របស់អង្គការសហប្រជាជាតិ (UNCTAD) បានឲ្យដឹង ភាពតានតឹងកាន់តែខ្លាំងឡើង បានបន្តរំខានដល់ការធ្វើនាវាចរណ៍ នៅទូទាំងតំបន់ដែនសមុទ្រជាច្រើន ក្នុងនោះរួមទាំងសមុទ្រក្រហម និងសមុទ្រការ៉ាអ៊ីព ខណៈពេលដែលហានិភ័យនៃការរំខាន ក៏បានកើតឡើងផងដែរ នៅជុំវិញច្រកសមុទ្រ Hormuz ដែលជាសរសៃឈាមដ៏សំខាន់ សម្រាប់ពាណិជ្ជកម្មប្រេងពិភពលោក។

របាយការណ៍បានបញ្ជាក់ថា ការដឹកជញ្ជូនជាសាកល ដែលប្រតិបត្តិការពាណិជ្ជកម្មពិភពលោកជាង ៨០ភាគរយ បានស្ថិតក្រោមសម្ពាធកាន់តែខ្លាំងឡើងៗ ខណៈកំណើនសេដ្ឋកិច្ចផុយស្រួយ ការចំណាយថ្លៃដើមខ្ពស់ និងភាពមិនប្រាកដប្រជា បានប៉ះពាល់ដល់វិស័យនេះ។

របាយការណ៍ក៏បានគូសបញ្ជាក់ផងដែរថា បន្ទាប់ពីមានកំណើនតិចតួច ២,២ភាគរយ ក្នុងឆ្នាំ២០២៤ ពាណិជ្ជកម្មតាមផ្លូវសមុទ្រ ត្រូវបានគេរំពឹងថា នឹងថយចុះមកត្រឹម ០,៥ភាគរយ ក្នុងឆ្នាំ២០២៥ ដោយព្រមានថា ភាពតានតឹងផ្នែកនយោបាយ ការផ្លាស់ប្តូរគំរូពាណិជ្ជកម្ម និងកំណត់រចនាសម្ព័ន្ធផ្លូវដឹកជញ្ជូនឡើងវិញ កំពុងធ្វើឲ្យភូមិសាស្ត្រពាណិជ្ជកម្មតាមសមុទ្រប្រែប្រួល។

អ្នកឯកទេសជាន់ខ្ពស់នៃស្ថាប័នគំនិតផ្តួចផ្តើមសន្តិសុខអន្តរអាត្លង់ទិករបស់ក្រុមប្រឹក្សាអាត្លង់ទិក នៅក្នុងមជ្ឈមណ្ឌល Scowcroft សម្រាប់យុទ្ធសាស្រ្ត និងសន្តិសុខ គឺលោកស្រី Elisabeth Braw បានប្រាប់សារព័ត៌មាន Anadolu ថា៖ «នេះជាឆ្នាំដ៏លំបាកមួយ សម្រាប់ប្រតិបត្តិការដែនសមុទ្រសកលទាំងអស់ មិនត្រឹមតែកើតមានចំពោះការដឹកជញ្ជូនប៉ុណ្ណោះទេ ប៉ុន្តែប៉ះពាល់គ្រប់ប្រតិបត្តិការពាណិជ្ជកម្ម នៅលើមហាសមុទ្រពិភពលោក»៕