ក្រោយពាក់កណ្ដាលអាធ្រាត្រថ្ងៃពុធ ទី៣១ ខែធ្នូ ឆ្នាំ២០២៥ បានរំលងផុត ឆ្នាំថ្មីក៏ចូលមកដល់ ដែលប្រែក្លាយថ្ងៃព្រហស្បតិ៍ ទី១ ខែមករា ឆ្នាំ២០២៦ នេះ ជាពេលវេលាដ៏សំខាន់ ជាមួយនឹងមនុស្សម្នាជុំវិញពិភពលោក បាននិយាយលាឆ្នាំចាស់ ដែលពោរពេញដោយបញ្ហា ហើយបានសម្តែងក្តីសង្ឃឹមសម្រាប់ឆ្នាំថ្មីដែលចូលមកដល់។

ទីតាំងដែលមើលឃើញឆ្នាំ២០២៦ មុនគេ គឺជាប្រជុំកោះដែលនៅជិតបំផុតនឹងខ្សែបន្ទាត់កាលបរិច្ឆេទអន្តរជាតិ នៃមហាសមុទ្រប៉ាស៊ីហ្វិក រួមមាន គីរីទីម៉ាទី (Kiritimati) ឬហៅថា កោះគ្រីស្មាស (Christmas Island) ព្រមទាំងតុងហ្គា និងនូវែលសេឡង់ជាដើម។ នៅអូស្ត្រាលី ទីក្រុងស៊ីដនីបានចាប់ផ្តើមឆ្នាំ ២០២៦ ជាមួយនឹងការអុជកាំជ្រួចភ្ញីដ៏ធំអស្ចារ្យ តាមប្រពៃណី។ បែបផែនកាំជ្រួចប្រហែល ៤ម៉ឺនម៉ូដ លាតសន្ធឹងលើអាកាសចម្ងាយ ៧គីឡូម៉ែត្រ ដោយជះពន្លឺពាសពេញទីក្រុង។

នៅអាស៊ី ទីក្រុងសេអ៊ូលរបស់កូរ៉េខាងត្បូង បានមើលឃើញហ្វូងមនុស្សរាប់ពាន់នាក់ ប្រមូលផ្តុំគ្នានៅពន្លាជួង Bosingak ជាទីដែលកណ្តឹងសំរិទ្ធមួយត្រូវបានគោះ ៣៣ដង នាពាក់កណ្តាលអធ្រាត្រ ដែលជាប្រពៃណីអបអរឆ្នាំថ្មីមួយ មានឫសគល់ដ៏យូរលង់។ នៅប្រទេសចិន មានការប្រារព្ធពិធីដ៏ធំនៅមហាកំពែងចិន ខាងក្រៅទីក្រុងប៉េកាំង ជាមួយនឹងការបាញ់កាំជ្រួចភ្ញីដ៏ចែងចាំងនៅទីផ្សេងទៀត។

នៅសហរដ្ឋអាមេរិក ទីក្រុងញូវយ៉កដែលមានសីតុណ្ហភាពក្រោមសូន្យអង្សាសេ គេឃើញមានការរៀបចំឆាកនៅទីលានចតុរង្គ Times Square សម្រាប់ពិធីអបអរប្រចាំឆ្នាំ ខណៈបណ្ដារដ្ឋ និងទីក្រុងផ្សេងទៀតបានប្រារព្ធពិធីជាបន្តបន្តាប់។ ស្រដៀងគ្នានេះដែរ បណ្ដាប្រទេសនៅតំបន់អឺរ៉ុប ក៏បានរៀបចំព្រឹត្តិការណ៍ជាច្រើន រួមទាំងពិធីជប់លៀងតន្ត្រី និងការបាញ់កាំជ្រួចទ្រង់ទ្រាយធំអបអរឆ្នាំថ្មី។

ក្រឡេកទៅមើលទីក្រុងគីវ និងទីក្រុងមូស្គូ ដែលមានព្រិលធ្លាក់ខ្លាំងវិញ ទាំងជនជាតិអ៊ុយក្រែន និងរុស្ស៊ី បានអបអរឆ្នាំថ្មីទាំងភាពស្រងូតស្រងាត់ ដោយបង្ហាញពីក្តីសង្ឃឹមចង់បានសន្តិភាពយូរអង្វែង បន្ទាប់ពីជម្លោះដ៏បង្ហូរឈាមជិត ៤ឆ្នាំមកនេះ៕