ក្រុមមន្ត្រីមកពីអ៊ុយក្រែន និងសហភាពអឺរ៉ុប បានបដិសេធជាថ្មីម្ដងទៀត ចំពោះការអះអាងរបស់ទីក្រុងមូស្គូ ដែលនិយាយថា អ៊ុយក្រែនបានកំណត់គោលដៅលើនិវេសនដ្ឋានឯកជនរបស់លោកប្រធានាធិបតីរុស្ស៊ី Vladimir Putin ដោយការវាយប្រហារយានដ្រូននៅសប្តាហ៍នេះ នៅក្នុងឧប្បត្តិហេតុមួយដែលគំរាមកំហែងរំខានដល់កិច្ចរចរចាសន្តិភាព ដឹកនាំដោយសហរដ្ឋអាមេរិក មុនពេលចូលឆ្នាំថ្មី។

កាលពីថ្ងៃចន្ទដើមសប្ដាហ៍នេះ រដ្ឋមន្ត្រីការបរទេសរុស្ស៊ី លោក Sergei Lavrov បានចោទប្រកាន់ថា អ៊ុយក្រែនបានព្យាយាមវាយប្រហារនិវេសនដ្ឋានរបស់លោក Putin នៅតំបន់ភាគខាងជើងក្រុង Novgorod ជាមួយនឹងយានដ្រូនរាប់សិបគ្រឿង ដោយបន្ថែមថា ជាលទ្ធផល ទីក្រុងមូស្គូ នឹងពិនិត្យឡើងវិញនូវជំហរចរចារបស់ខ្លួន។

កាសែត Wall Street Journal រាយការណ៍កាលពីថ្ងៃពុធ (៣១ ធ្នូ) ថា ក្រុមមន្ត្រីសន្តិសុខជាតិអាមេរិក រកឃើញថា អ៊ុយក្រែនមិនបានកំណត់គោលដៅលើលោក Putin ឬនិវេសនដ្ឋានរបស់លោក ក្នុងការវាយប្រហារយានដ្រូននោះទេ។ អ៊ុយក្រែនបានបដិសេធការវាយប្រហារបែបនេះ ដោយពណ៌នាការចោទប្រកាន់នោះថា ជាយុទ្ធនាការផ្សព្វផ្សាយព័ត៌មានមិនពិតរបស់រុស្ស៊ី ដែលមានក្នុងបំណងបង្កើតចលាចលរវាងទីក្រុងគីវ និងទីក្រុងវ៉ាស៊ីនតោន។ កាលពីថ្ងៃពុធ លោកស្រី Kaja Kallas អ្នកការទូតជាន់ខ្ពស់របស់សហភាពអឺរ៉ុប បានហៅការអះអាងរបស់រុស្ស៊ីថាជា «ការរំខានដោយចេតនា»។

លោកប្រធានាធិបតីអាមេរិក Donald Trump វិញ ដំបូងឡើយបានសម្តែងការអាណិតអាសូរចំពោះការចោទប្រកាន់របស់រុស្ស៊ី ដោយប្រាប់អ្នកយកព័ត៌មានកាលពីថ្ងៃចន្ទថា លោក «ខឹងសម្បារយ៉ាងខ្លាំង» អំពីរឿងនេះ។ ប៉ុន្តែកាលពីថ្ងៃពុធ លោកហាក់ដូចជាសង្ស័យកាន់តែខ្លាំង ដោយបានចែករំលែកលើប្រព័ន្ធផ្សព្វផ្សាយសង្គមនូវអត្ថបទវិចារណកថាមួយរបស់កាសែត New York Post ដែលចោទរុស្ស៊ីថា រារាំងសន្តិភាពនៅអ៊ុយក្រែន៕