អធិការបតីអាល្លឺម៉ង់ លោក Friedrich Merz កាលពីថ្ងៃពុធ បាននិយាយថា អឺរ៉ុបត្រូវតែការពារផលប្រយោជន៍របស់ខ្លួនយ៉ាងម៉ឺងម៉ាត់ នៅក្នុងពិភពលោកដែលមានភាពប្រែប្រួលកាន់តែខ្លាំងឡើង ក្នុងអំឡុងពេលថ្លែងសុន្ទរកថាឆ្នាំថ្មីរបស់លោក។

នៅក្នុងសុន្ទរកថានោះ លោក Merz បានកំណត់លក្ខណៈស្ថានភាពសកលបច្ចុប្បន្នថា ជា «ការផ្លាស់ប្តូរតាមសម័យកាល» ដែលត្រូវបានសម្គាល់ដោយភាពចលាចលភូមិសាស្ត្រនយោបាយ ការវិលត្រឡប់ទៅរកការការពារនិយម និងការផ្លាស់ប្តូរដំណើរការទំនាក់ទំនងឆ្លងមហាសមុទ្រអាត្លង់ទិក។

លោកបានថ្លែងថា៖«ភាពជាដៃគូរបស់យើងជាមួយសហរដ្ឋអាមេរិក ដែលជាអ្នកធានាដ៏គួរឲ្យទុកចិត្តនៃសន្តិសុខរបស់យើងជាយូរមកហើយ កំពុងផ្លាស់ប្តូរ»។ «សម្រាប់យើងជាជនជាតិអឺរ៉ុប នេះមានន័យថា យើងត្រូវតែធានា និងការពារផលប្រយោជន៍របស់យើងឲ្យកាន់តែរឹងមាំដោយខ្លួនឯង»។

ក្នុងការដោះស្រាយស្ថានភាពសន្តិសុខ លោក Merz បាននិយាយថា ប្រទេសអាល្លឺម៉ង់ ត្រូវតែកែលម្អសមត្ថភាពទប់ស្កាត់ និងការពាររបស់ខ្លួន ដើម្បីធានាសន្តិភាពរយៈពេលវែង។

ចំពោះសេដ្ឋកិច្ច លោកបានសន្យាថា រដ្ឋាភិបាលរបស់លោក ដែលបង្កើតឡើងបន្ទាប់ពីការបោះឆ្នោតសហព័ន្ធ ក្នុងខែកុម្ភៈ ឆ្នាំ ២០២៥ នឹងផ្តោតលើការស្តារឡើងវិញនូវការប្រកួតប្រជែងរបស់អាល្លឺម៉ង់ ដោយកាត់បន្ថយនីតិវិធីរដ្ឋបាលដែលហួសហេតុ ស្មុកស្មាញ និងយឺតយ៉ាវ និងលើកកម្ពស់ការច្នៃប្រឌិតផ្នែកបច្ចេកវិទ្យា៕