អ្នកនាំពាក្យនគរបាលស្វីស មួយរូបបាននិយាយថា មនុស្សជាច្រើននាក់បានស្លាប់ និងមួយចំនួនទៀតរងរបួស បន្ទាប់ពីអគ្គិភ័យដ៏ធំបានផ្ទុះឡើង ក្នុងពិធីជប់លៀងឆ្នាំថ្មីមួយនៅឯរមណីយដ្ឋានជិះស្គីមួយកន្លែងនៃតំបន់ភ្នំអាល់ នៅភាគខាងត្បូងប្រទេសស្វីស។

លោក Gaetan Lathion អ្នកនាំពាក្យរបស់នគរបាលតំបន់ Valais បាននិយាយ «នាថ្ងៃទី១ ខែមករា ឆ្នាំ២០២៦ នេះ មានអគ្គិភ័យមួយបានឆាបឆេះនៅវេលាម៉ោងក្នុងស្រុកប្រហែល ១:៣០ នាទីយប់រំលងអាធ្រាត្រ នៅបារឈ្មោះ Le Constellation ក្នុងទីក្រុង Crans-Montana ក្នុងតំបន់ Valais ប្រទេសស្វីស ដោយមានអ្នករងរបួស និងអ្នកស្លាប់ជាច្រើននាក់»។

អគ្គិភ័យនេះកើតឡើងក្នុងតំបន់ជិះស្គីភ្នំអាល់ ដែលជារមណីយដ្ឋានវិស្សមកាលលំដាប់ខ្ពស់ដ៏ល្បីល្បាញរបស់ស្វីស។ វីដេអូលើបណ្តាញសង្គម ដែលជាក់ស្តែងថតពីផ្លូវនៅខាងក្រៅបារនោះ បានបង្ហាញឱ្យឃើញអណ្ដាតភ្លើងកំពុងឆាបឆេះនៅខាងក្នុងអគារ។

សារព័ត៌មានស្វីស Blick បានលើកឡើងថា អគ្គិភ័យនោះអាចបណ្តាលមកពីការអុជកាំជ្រួចក្នុងអំឡុងពេលប្រគំតន្ត្រីអបអរឆ្នាំថ្មី ហើយមានមនុស្សជាង ១០០នាក់ នៅក្នុងបារអំឡុងការផ្ទុះកើតឡើង ប៉ុន្តែនគរបាលនគរបាលមិនបានផ្តល់តួលេខពិតប្រាកដសម្រាប់ចំនួនអ្នកស្លាប់ និងរបួស ឬសេចក្ដីលម្អិតអ្វីឡើយ ខណៈមូលហេតុក៏មិនទាន់ដឹងច្បាស់ដែរ៕