ប្រធានាធិបតីលីបង់ លោក Joseph Aoun កាលពីថ្ងៃពុធ បានព្យាយាមធានាដល់ប្រជាពលរដ្ឋនៅក្នុងសុន្ទរកថាចុងឆ្នាំរបស់លោក ដោយនិយាយថា៖«បរិយាកាសទាំងមូលនៅតែវិជ្ជមាន ហើយហានិភ័យនៃ  សង្គ្រាម កំពុងរសាត់បាត់» ចំពេលមានការព្រួយបារម្ភយ៉ាងទូលំទូលាយអំពីលទ្ធភាពបង្កើនការវាយប្រហាររបស់អ៊ីស្រាអែលប្រឆាំងនឹងក្រុមហេសបូឡា។

ការភ័យខ្លាចចំពោះការបន្តការវាយប្រហារឡើងវិញ បានកើតឡើងបន្ទាប់ពីការរិះគន់របស់អ៊ីស្រាអែលចំពោះប្រតិបត្តិការរឹបអូសអាវុធរបស់កងទ័ពលីបង់ ដែលត្រូវបានកំណត់ឲ្យចូលដល់ដំណាក់កាលទី ២ របស់ខ្លួន នៅដើមឆ្នាំ ២០២៦។ ផែនការនេះ រួមមានការពង្រីកពីតំបន់ភាគខាងជើងនៃទន្លេ Litani ទៅទន្លេ Awali បន្ទាប់ពីដំណាក់កាលទី ១ ត្រូវបានបញ្ចប់ នៅភាគខាងត្បូងនៃទន្លេ Litani។

លោកប្រធានាធិបតី Aoun បានព្រមានថា នេះមិនមានន័យថា «លុបបំបាត់ហានិភ័យនៃសង្គ្រាមទាំងស្រុង» ទេ ដោយសង្កត់ធ្ងន់ថា «ការងារកំពុងដំណើរការជាមួយប្រទេសមិត្តភាព និងបងប្អូនជាច្រើន ដើម្បីបញ្ចប់ការគំរាមកំហែងនៃសង្គ្រាមទាំងស្រុង»។

ថ្លែងទៅកាន់មន្ត្រីសន្តិសុខផ្ទៃក្នុង លោក Aoun បាននិយាយថា «ស្ថានភាព គឺស្ថិតក្នុងចំណោមស្ថានភាពល្អបំផុត» ដោយកត់សម្គាល់ថា ការវាយតម្លៃនេះ ត្រូវបានបញ្ជាក់ ដោយអ្នកទេសចរបរទេសមកកាន់ប្រទេសលីបង់ ទោះបីជាមានភាពតានតឹងដែលបានបង្កឡើងដោយជនភៀសខ្លួនស៊ីរី និងប៉ាឡេស្ទីនមួយចំនួនធំក៏ដោយ។

លោកបានបន្ថែមថា កងកម្លាំងសន្តិសុខកំពុងបំពេញកាតព្វកិច្ចរបស់ពួកគេយ៉ាងពេញលេញ និងដោះស្រាយឧក្រិដ្ឋកម្ម ជាមួយនឹងល្បឿនលឿនមួយគួរឲ្យកត់សម្គាល់ ដោយចង្អុលបង្ហាញពីដំណើរទស្សនកិច្ចដ៏ជោគជ័យរបស់សម្តេចប៉ាប ឡេអូ ទី១៤ (Leo XIV) កាលពីដើមឆ្នាំនេះថា ជាភស្តុតាងបន្ថែមនៃវឌ្ឍន   ភាព៕