មជ្ឈមណ្ឌលព័ត៌មានគុណភាពខ្យល់ក្រុងបាងកក បានរាយការណ៍នៅវេលាម៉ោង ៧ព្រឹក (ម៉ោងក្នុងស្រុក) នាថ្ងៃព្រហស្បតិ៍ (ទី១ ខែមករា) នេះថា កម្រិតកំហាប់ភាគល្អិតនិចល PM2.5 ជាមធ្យម ក្នុងរយៈពេល ២៤ម៉ោង នៅទូទាំងរាជធានីរបស់ប្រទេសថៃមួយនេះ បានស្ថិតនៅចន្លោះពី ៣៧,៤ ទៅ ៧០,៣មីក្រូក្រាម ក្នុងមួយម៉ែត្រគូបខ្យល់ ដោយលើសពីស្តង់ដារដែលបានកំណត់មិនឲ្យលើសពី ៣៧,៥មីក្រូក្រាម។

តំបន់ភាគច្រើននៃទីក្រុងបាងកក ត្រូវបានចាត់ចូលជាប្រភេទពណ៌ទឹកក្រូច ដែលមានន័យថា ការបំពុលខ្យល់ កំពុងចាប់ផ្តើមប៉ះពាល់ដល់សុខភាព ដោយផ្អែកលើរង្វាស់ពីស្ថានីយត្រួតពិនិត្យចំនួន ៦៨កន្លែង។ កម្រិត PM2.5 ខ្ពស់បំផុត ត្រូវបានកត់ត្រាក្នុងតំបន់ Chatuchak នៅស្ថានីយមួយកន្លែង ទល់មុខសាកលវិទ្យាល័យ Kasetsart ដោយរង្វាស់ស្ថិតនៅ ៧០,៣មីក្រូក្រាម ក្នុងមួយម៉ែត្រគូបខ្យល់។

កម្រិតនោះត្រូវបានតាមមកដោយតំបន់ Don Mueang ៦៨,៧មីក្រូក្រាម ហើយតំបន់ Lat Krabang និង Prawet ៦៨,២មីក្រូក្រាម។ ចំណែកតំបន់ពាណិជ្ជកម្មសំខាន់ៗមួយចំនួន រួមមាន Pathum Wan, Khlong Toei, Yan Nawa និង Sathon ក៏បានធ្លាក់ចូលទៅក្នុងតំបន់ពណ៌ទឹកក្រូចផងដែរ ដោយបានគូសបញ្ជាក់ថា តើការបំពុលខ្យល់បានរីករាលដាលពាសពេញទីក្រុងនៅព្រឹកថ្ងៃចូលឆ្នាំថ្មីនេះកម្រិតណា។

រដ្ឋបាលក្រុងបាងកក (BMA) បានឲ្យដឹងថា សន្ទស្សន៍គុណភាពខ្យល់ (AQI) នៅស្ថានីយ៍ភាគច្រើនរបស់ខ្លួន នៅតែស្ថិតក្នុងកម្រិតមួយដែលការប៉ះពាល់សុខភាព អាចនឹងចាប់ផ្តើមមាន៕