ប្រធានាធិបតីចិន លោក Xi Jinping នឹងធ្វើជាម្ចាស់ផ្ទះទទួលស្វាគមន៍លោកប្រធានាធិបតីកូរ៉េខាងត្បូង Lee Jae Myung ក្នុងដំណើរទស្សនកិច្ចផ្លូវរដ្ឋ ដែលចាប់ផ្តើមនៅថ្ងៃអាទិត្យ ចុងសប្ដាហ៍នេះ ក្នុងសញ្ញាមួយបង្ហាញពីបំណងរបស់ទីក្រុងប៉េកាំង ក្នុងការពង្រឹងទំនាក់ទំនងជាមួយទីក្រុងសេអ៊ូល ស្របពេលមានទំនាក់ទំនងតានតឹងជាមួយប្រទេសជប៉ុន ជុំវិញបញ្ហាកោះតៃវ៉ាន់។

ក្រុមអ្នកវិភាគនិយាយថា ដំណើរទស្សនកិច្ចក្នុងឆ្នាំថ្មីនេះគឺជាកិច្ចប្រជុំលើកទីពីរហើយរវាងលោក Xi និងលោក Lee ក្នុងពេលត្រឹមតែពីរខែប៉ុណ្ណោះ ដោយជាចន្លោះពេលខ្លីមិនធម្មតា ដែលបង្ហាញពីចំណាប់អារម្មណ៍យ៉ាងខ្លាំងរបស់ប្រទេសចិន ក្នុងការពង្រឹងទំនាក់ទំនងជាមួយទីក្រុងសេអ៊ូល និងជំរុញកិច្ចសហប្រតិបត្តិការសេដ្ឋកិច្ច និងទេសចរណ៍។

ទំនាក់ទំនងរវាងចិន និងជប៉ុន ស្ថិតនៅចំណុចត្រជាក់ស្រេបបំផុតក្នុងពេលជាច្រើនឆ្នាំ បន្ទាប់ពីនាយករដ្ឋមន្ត្រីជប៉ុន លោកស្រី Sanae Takaichi បានលើកឡើងកាលពីខែវិច្ឆិកាកន្លងទៅថា ការវាយក្រសោបរបស់ចិន លើតំបន់តៃវ៉ាន់ អាចបង្កឱ្យមានការឆ្លើយតបផ្នែកយោធាពីទីក្រុងតូក្យូ។

ក្រុមអ្នកវិភាគនិយាយថា ការអញ្ជើញរបស់លោក Xi ទៅកាន់លោក Lee សម្រាប់ដំណើរទស្សនកិច្ចផ្លូវរដ្ឋ ចាប់ពីថ្ងៃអាទិត្យខាងមុខនេះ គឺជាជំហានគ្រោងទុក ដែលមានបំណងពង្រឹងទំនាក់ទំនងទ្វេភាគី ជាពិសេសមុនពេលមេដឹកនាំកូរ៉េខាងត្បូងរូបនេះ ទៅទស្សនកិច្ចនៅជប៉ុន។

រដ្ឋបាលលោក Lee និយាយថា ខ្លួនមានបំណង «ស្តារ» ទំនាក់ទំនងជាមួយទីក្រុងប៉េកាំង ដោយទទួលស្គាល់ថា ចិនគឺជាដៃគូពាណិជ្ជកម្មធំបំផុតរបស់កូរ៉េខាងត្បូង។ លោក Lee ផ្ទាល់ក៏បាននិយាយកាលពីខែធ្នូថា លោកនឹងមិនចូលខាងណាមួយនោះទេ នៅក្នុងជម្លោះការទូតរវាងចិន និងជប៉ុន៕