សហរដ្ឋអាមេរិកបានអំពាវនាវឱ្យប្រទេសចិនអនុវត្ត «ភាពអត់ធ្មត់» និងបញ្ចៀសសកម្មភាពដែលបង្កើនភាពតានតឹងបន្ទាប់ពីហ្គេមសង្គ្រាមជាបន្តបន្ទាប់នៅជុំវិញកោះតៃវ៉ាន់ ដែលធ្វើប្រដូចទៅនឹងការបិទផ្លូវកោះនេះ។

ក្រសួងការបរទេសសហរដ្ឋអាមេរិក បាននិយាយនៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ថា ភាសាបង្កសង្គ្រាមនិងសមយុទ្ធយោធារបស់ប្រទេសចិន ដែលជំរុញឱ្យមានការថ្កោលទោសយ៉ាងខ្លាំងពីទីក្រុងតៃប៉ិ គឺជាប្រភពនៃភាពតានតឹងដែលមិនចាំបាច់សោះ។

អ្នកនាំពាក្យក្រសួងការបរទេស លោក Tommy Pigott បាននិយាយថា «សកម្មភាពយោធា និងវោហាសាស្ត្ររបស់ប្រទេសចិនចំពោះកោះតៃវ៉ាន់និងប្រទេសដទៃទៀតនៅក្នុងតំបន់ បានបង្កើនភាពតានតឹងដែលមិនចាំបាច់។ យើងជំរុញឱ្យទីក្រុងប៉េកាំងអនុវត្តភាពអត់ធ្មត់ បញ្ឈប់សម្ពាធយោធារបស់ខ្លួនលើកោះតៃវ៉ាន់ ហើយជំនួសមកវិញចូលរួមក្នុងការសន្ទនាដែលមានន័យ»។

លោកបាននិយាយបន្ថែមថា «សហរដ្ឋអាមេរិកគាំទ្រសន្តិភាពនិងស្ថិរភាពនៅទូទាំងច្រកសមុទ្រតៃវ៉ាន់ និងប្រឆាំងការផ្លាស់ប្តូរជាឯកតោភាគីចំពោះស្ថានភាពបច្ចុប្បន្ន រួមទាំងការប្រើកម្លាំង ឬការបង្ខិតបង្ខំ»។ ប្រទេសចិនបានបាញ់មីស៊ីល និងដាក់ពង្រាយយន្តហោះចម្បាំង និងនាវាកងទ័ពជើងទឹកកាលពីដើមសប្តាហ៍នេះ ក្នុងការក្លែងប្រដូចសកម្មភាពយោធាដើម្បីហ៊ុមព័ទ្ធកោះតៃវ៉ាន់ដែលទីក្រុងប៉េកាំងអះអាងសិទ្ធថាជាផ្នែកដ៏សំខាន់មួយនៃទឹកដីរបស់ខ្លួន និងបានសន្យាថានឹងនាំយកមកឲ្យស្ថិតនៅក្រោមការគ្រប់គ្រងរបស់ខ្លួន។