អ៊ីស្រាអែល ប្រឈមទៅនឹងការថ្កោលទោសកាន់តែខ្លាំងឡើងជាសកល ខណៈបម្រាមលើអង្គការជំនួយអន្តរជាតិរាប់សិបអង្គការដែលកំពុងធ្វើការដើម្បីផ្តល់ជំនួយសង្គ្រោះជីវិតដល់ពលរដ្ឋប៉ាឡេស្ទីននៅក្នុងតំបន់ហ្កាហ្សាដែលរងការបំផ្លិចបំផ្លាញដោយសង្គ្រាម បានចូលជាធរមាន។

កាលពីថ្ងៃព្រហស្បតិ៍ ក្រុមអង្គការសិទ្ធិមនុស្សនិងតស៊ូមតិចំនួន១៧អង្គការនៅក្នុងប្រទេសអ៊ីស្រាអែលបានថ្កោលទោសបម្រាមនេះ ដោយនិយាយថាវា «ធ្វើឱ្យអន្តរាយដល់សកម្មភាពមនុស្សធម៌ បង្កគ្រោះថ្នាក់ដល់បុគ្គលិកនិងសហគមន៍ និងធ្វើឱ្យប៉ះពាល់ដល់ការដឹកជញ្ជូនជំនួយប្រកបដោយប្រសិទ្ធភាព»។

ក្រុមទាំងនោះបាននិយាយថា «អ៊ីស្រាអែល ក្នុងនាមជាប្រទេសដែលចូលកាន់កាប់អំណាច មានកាតព្វកិច្ចធានាការផ្គត់ផ្គង់គ្រប់គ្រាន់ដល់ជនស៊ីវិលប៉ាឡេស្ទីន។ វាមិនត្រឹមតែបរាជ័យក្នុងការបំពេញកាតព្វកិច្ចប៉ុណ្ណោះទេ ប៉ុន្តែថែមទាំងបានរារាំងអ្នកដទៃពីការបំពេញភាពខ្វះចន្លោះផងដែរ»។

អ៊ីស្រាអែល បានដកហូតអាជ្ញាប័ណ្ណប្រតិបត្តិការរបស់ក្រុមជំនួយចំនួន ៣៧ ក្រុម រួមទាំងអង្គការគ្រូពេទ្យគ្មានព្រំដែន និងក្រុមប្រឹក្សាជនភៀសខ្លួនន័រវេស ចំពោះការមិនអនុវត្តតាមបទប្បញ្ញត្តិថ្មីរបស់រដ្ឋាភិបាល។

ច្បាប់ថ្មីតម្រូវឱ្យអង្គការមិនមែនរដ្ឋាភិបាលអន្តរជាតិដែលកំពុងធ្វើការនៅក្នុងតំបន់ហ្កាហ្សា និងតំបន់កាន់កាប់ West Bank ផ្តល់ព័ត៌មានលម្អិតអំពីសមាជិកបុគ្គលិក ព្រមទាំងមូលនិធិ និងប្រតិបត្តិការរបស់ពួកគេ។

អ៊ីស្រាអែល បានការពារចំណាត់ការនេះដោយចោទប្រកាន់អង្គការអន្តរជាតិដែលធ្វើការនៅតំបន់ហ្កាហ្សាថាមានទំនាក់ទំនងជាមួយក្រុមហាម៉ាសនិងក្រុមជីហាដអ៊ីស្លាមប៉ាឡេស្ទីន ដោយមិនផ្តល់ភស្តុតាងណាមួយឡើយ។