ក្រុមមន្ត្រីបាននិយាយថា មានមនុស្សគប់កាំជ្រួចដាក់នគរបាលនៅហូឡង់ ខណៈមន្រ្តីអនុវត្តច្បាប់របស់ប្រទេសនេះ ប្រឈមមុខនឹង «អំពើហិង្សាដែលមិនធ្លាប់មានពីមុនមក» នៅថ្ងៃចូលឆ្នាំថ្មី ២០២៦ នេះ។ ក្រៅពីហិង្សា ហូឡង់ក៏បានមើលឃើញឧប្បត្តិហេតុឆ្នាំថ្មីដ៏កំណាច ដោយវិហារសាសនាគ្រិស្តមួយសម័យសតវត្សរ៍ទី១៩ នៅទីក្រុងអាំស្ទែរដាំ ត្រូវបានអគ្គិភ័យលេបត្របាក់ទាំងព្រឹកព្រលឹមថ្ងៃចូលឆ្នាំថ្មី ប៉ុន្តែមូលហេតុនៃចំហេះមិនទាន់ដឹងនៅឡើយទេ។

វិហារសាសនាគ្រិស្តនោះឈ្មោះ Vondelkerk ជាទីទាក់ទាញភ្ញៀវទេសចរជាច្រើន ចាប់តាំងពីត្រូវបានសាងសង់ឡើងនៅឆ្នាំ១៨៧២មក ដោយសារតែអាចមើលឃើញទេសភាពរំលងឧទ្យានធំជាងគេនៅក្នុងទីក្រុងនេះ គឺឧទ្យាន Vondelpark ដ៏ស្រស់ស្អាត។

របាយការណ៍អំពីការវាយប្រហារប្រឆាំងនឹងនគរបាល និងអ្នកពន្លត់អគ្គិភ័យបានរីករាលដាលពាសពេញប្រទេស។ ប្រធានសហភាពនគរបាលហូឡង់ លោកស្រី Nine Kooiman បាននិយាយថា លោកស្រីផ្ទាល់ត្រូវបានគេគប់កាំជ្រួចដាក់ ជាមួយនឹងគ្រឿងផ្ទុះផ្សេងទៀត ក្នុងពេលវេនប្រចាំការនៅទីក្រុងអាំស្ទែរដាំ ខណៈលោកស្រីបាននិយាយថា ទំហំអំពើហិង្សាលើនគរបាលហូឡង់គឺ «មិនធ្លាប់មានពីមុនមកនោះទេ»។ ជាមួយគ្នានេះ គ្រាប់បែកសាំងត្រូវបានគប់ទៅលើណគរបាលនៅភាគខាងត្បូងទីក្រុង Breda។

នៅកន្លែងផ្សេងទៀតក្នុងប្រទេសហូឡង់ ក្មេងប្រុស ១៧ឆ្នាំម្នាក់ និងបុរស ៣៨ឆ្នាំម្នាក់ បានស្លាប់ក្នុងឧប្បត្តិហេតុបាញ់កាំជ្រួចភ្ញីដើម្បីអបអរឆ្នាំថ្មី។ ការហាមឃាត់លើកាំជ្រួចក្រៅផ្លូវការនៅហូឡង់ នឹងចូលជាធរមាននៅឆ្នាំ២០២៦ នេះ។ យោងតាមសមាគមកាំជ្រួចហូឡង់ បានឱ្យដឹងថា ទឹកប្រាក់ដ៏ច្រើនបំផុតកំណត់ត្រាចំនួន ១២៩លានអឺរ៉ូ ត្រូវបានចំណាយលើការទិញកាំជ្រួចទាំងនោះនៅឆ្នាំថ្មីនេះ៕