យោងតាមរបាយការណ៍ប្រព័ន្ធផ្សព្វផ្សាយអ៊ីស្រាអែល បានឱ្យដឹងក្នុងសប្ដាហ៍នេះថា អ៊ីស្រាអែល កំពុងរៀបចំបើកច្រកឆ្លងកាត់ Rafah ដ៏សំខាន់ឡើងវិញ រវាងតំបន់ហ្កាហ្សាស្ទ្រីប និងប្រទេសអេហ្ស៊ីប ក្នុងទិសដៅទាំងពីរ បន្ទាប់ពីលោកនាយករដ្ឋមន្ត្រីអ៊ីស្រាអែល Benjamin Netanyahu ត្រឡប់មកពីទស្សនកិច្ចនៅសហរដ្ឋអាមេរិកវិញ។

សារព័ត៌មាន Kan 11 របស់អ៊ីស្រាអែល បានរាយការណ៍នៅថ្ងៃពុធសប្ដាហ៍នេះថា ការសម្រេចចិត្តដែលរំពឹងទុកនេះ បានកើតឡើងជាលទ្ធផលនៃសម្ពាធពីលោកប្រធានាធិបតីអាមេរិក Donald Trump។ សារព័ត៌មាន Kan បន្តថា ការពិភាក្សាអំពីការបើកច្រកឡើងវិញក្នុងទិសដៅទាំងពីរ ត្រូវបានធ្វើឡើងមុនពេលលោក Netanyahu ជួបជាមួយលោក Trump នៅសហរដ្ឋអាមេរិក កាលពីចុងខែធ្នូទៅទៀត ប៉ុន្តែត្រូវបានពន្យារពេល។ ប្រព័ន្ធផ្សព្វផ្សាយនេះបន្ថែមថា ប្រភពព័ត៌មានអាមេរិកមួយជឿថា ការប្រកាសបើកច្រក Rafah ឡើងវិញ នឹងធ្វើឡើងក្នុងប៉ុន្មានថ្ងៃខាងមុខ។

សម្រាប់ប្រជាជនប៉ាឡេស្ទីននៅតំបន់ហ្កាហ្សា ច្រកឆ្លងកាត់ Rafah ជាផ្លូវតភ្ជាប់តែមួយគត់ទៅកាន់ពិភពខាងក្រៅ ជាយូរមកហើយ។ កាលពីខែឧសភា ឆ្នាំ២០២៤ កងកម្លាំងអ៊ីស្រាអែល បានកាន់កាប់ផ្នែកម្ខាងនៃច្រកឆ្លងកាត់ប៉ាឡេស្ទីនមួយនេះ ដោយរារាំងការធ្វើដំណើរ និងបង្កឱ្យមានវិបត្តិមនុស្សធម៌ធ្ងន់ធ្ងរដោយសារជំនួយមិនអាចចូលទៅហ្កាហ្សា។

នៅក្រោមដំណាក់កាលដំបូងនៃផែនការសន្តិភាព ២០ចំណុចរបស់លោក Trump សម្រាប់តំបន់ហ្កាហ្សា — ដែលចូលជាធរមានក្នុងខែតុលា ឆ្នាំ២០២៥ ដើម្បីបញ្ចប់សង្គ្រាមរបស់អ៊ីស្រាអែលនៅទីនោះ — បានអំពាវនាវឱ្យអាជ្ញាធរអ៊ីស្រាអែល អនុញ្ញាតឱ្យជំនួយមនុស្សធម៌ចូលទៅហ្កាហ្សា និងបើក «ច្រកឆ្លងកាត់ Rafah ទាំងសងខាង» ប៉ុន្តែអ៊ីស្រាអែល នៅតែបន្តរឹតត្បិតជំនួយចូលទៅដែនដីដ៏តូចចង្អៀតនោះ៕