មនុស្សប្រហែល ៥២ម៉ឺននាក់ បានប្រមូលផ្តុំគ្នានៅព្រឹកថ្ងៃចូលឆ្នាំថ្មីគឺថ្ងៃព្រហស្បតិ៍ ទី១ ខែមករា ឆ្នាំ២០២៦ នេះ នៅឯស្ពាន Galata ក្នុងទីក្រុងអ៊ីស្តង់ប៊ុល ប្រទេសទួរគី សម្រាប់ការដើរដង្ហែក្បួនដ៏ធំមួយដើម្បីគាំទ្រប្រជាជនប៉ាឡេស្ទីន ដែលរៀបចំឡើងក្រោមឆ័ត្រសម្ព័ន្ធមនុស្សធម៌ និងវេទិកាឆន្ទៈជាតិ។

ក្បួនដើរដង្ហែនេះ ធ្វើឡើងដោយមានការចូលរួមពីអង្គការសង្គមស៊ីវិលជាង ៤០០ក្រុម និងដឹកនាំដោយមូលនិធិយុវជនទួរគី (TUGVA) ហើយត្រូវបានអនុវត្តក្រោមឃ្លាបាតុកម្មថា «យើងនឹងមិនភ័យខ្លាច យើងនឹងមិននៅស្ងៀម យើងនឹងមិនភ្លេចប៉ាឡេស្ទីនឡើយ»។ អ្នកចូលរួមបានអំពាវនាវឱ្យបញ្ចប់អំពើហិង្សានៅតំបន់ហ្កាហ្សា។

ទោះបីជាសីតុណ្ហភាពត្រជាក់ខ្លាំងក៏ដោយ ក៏អ្នកចូលរួនៅតែមានចំនួនច្រើន។ វិធានការសន្តិសុខយ៉ាងទូលំទូលាយត្រូវបានអនុវត្ត ជាពិសេសនៅជុំវិញទីលានចតុរង្គ Sultanahmet របស់ទីក្រុង។ បន្ទាប់ពីការអធិស្ឋានពេលព្រឹករួច ក្រុមបាតុករក៏បានដើរក្បួនដោយថ្មើរជើង ឆ្ពោះទៅកាន់ស្ពាន Galata ដោយមានការចូលរួមពីក្រុមរដ្ឋមន្ត្រី មន្ត្រីជាន់ខ្ពស់ និងឥស្សរជនល្បីល្បាញជាច្រើន។

ដោយដកស្រង់តួលេខស្តីពីការបំផ្លិចបំផ្លាញនៅតំបន់ហ្កាហ្សា ប្រធានមូលនិធិយុវជនទួរគី បានប្រាប់ហ្វូងមនុស្សក្នុងក្បួននោះថា ក្នុងពេល ២៧ខែកន្លងមកនេះ គ្រាប់បែក ២១ម៉ឺនតោន ត្រូវបានទម្លាក់លើតំបន់ហ្កាហ្សា ជនស៊ីវិល ៧ម៉ឺននាក់ ត្រូវបានសម្លាប់ ហើយអ្នកស្រុក ២.៦០០គ្រួសារ ត្រូវបានលុបចេញទាំងស្រុងពីបញ្ជីឈ្មោះប្រជាជនហ្កាហ្សា ទាំងមូល៕