កំណើនប្រជាជនអ៊ីស្រាអែលបានឈានដល់កម្រិតទាបបំផុតក្នុងប្រវត្តិសាស្ត្រ នៅឆ្នាំ ២០២៥ ដែលភាគច្រើនដោយសារតែការថយចុះនូវការកើនឡើងចំនួនប្រជាជនជាក់លាក់ និងតុល្យភាពនៃការធ្វើទេសន្តរប្រវេសន៍អវិជ្ជមានជាប់លាប់។ នេះបើយោងតាមរបាយការណ៍ប្រចាំឆ្នាំដែលចេញផ្សាយកាលពីថ្ងៃពុធ។

របាយការណ៍ស្តីពីស្ថានភាពប្រជាជាតិឆ្នាំ ២០២៥ ដែលបោះពុម្ពផ្សាយដោយមជ្ឈមណ្ឌលសិក្សាគោលនយោបាយសង្គម Taub ក្នុងប្រទេសអ៊ីស្រាអែល បាននិយាយថា ចំនួនប្រជាជនអ៊ីស្រាអែល ដែលមានប្រហែល ១០,២ លាននាក់ បានកើនឡើងត្រឹមតែ ០,៩ ភាគរយប៉ុណ្ណោះ ដែលជាអត្រាទាបបំផុត ចាប់តាំងពីប្រទេសនេះ ត្រូវបានបង្កើតឡើងក្នុងឆ្នាំ ១៩៤៨។

ទាក់ទងនឹងកំណើនប្រជាជនជាក់លាក់ របាយការណ៍នេះ បានពន្យល់ថា ខណៈពេលដែលចំនួនកំណើតនៅតែមានស្ថិរភាព ក្នុងប៉ុន្មានឆ្នាំថ្មីៗនេះ អត្រាមានកូនបានធ្លាក់ចុះនៅទូទាំងក្រុមប្រជាជនស្ទើរតែទាំង អស់។

ក្នុងពេលជាមួយគ្នានេះ ចំនួនអ្នកស្លាប់ កំពុងកើនឡើង នៅពេលដែលក្រុមមនុស្សអាយុច្រើន ចូលដល់អាយុ ៧០ និង ៨០ ឆ្នាំ។ អាយុកាលសង្ឃឹមរស់ នៅតែខ្ពស់ ប៉ុន្តែចំនួនប្រជាជនវ័យចំណាស់មានន័យថា មានអ្នកស្លាប់កាន់តែច្រើនជារៀងរាល់ឆ្នាំ។

គំរូនៃការធ្វើទេសន្តរប្រវេសន៍ បានផ្លាស់ប្តូរយ៉ាងខ្លាំង ដោយមានមនុស្សចាកចេញពីអ៊ីស្រាអែលច្រើនជាងចូលមក នៅឆ្នាំ ២០២៤ និង ២០២៥។ នៅឆ្នាំ ២០២៥ គម្លាតនេះត្រូវបានគេព្យាករថា នឹងឈានដល់ ៣៧.០០០នាក់។

មនុស្សភាគច្រើនដែលចាកចេញពីអ៊ីស្រាអែល មិនបានកើតនៅទីនោះទេ ហើយកំពុងវិលត្រឡប់ទៅកាន់ប្រទេសដែលពួកគេធ្លាប់រស់នៅពីមុន។ យ៉ាងណាក៏ដោយ ការធ្វើទេសន្តរប្រវេសន៍ក្នុងចំណោមពលរដ្ឋដែលកើតនៅអ៊ីស្រាអែល ក៏កំពុងកើនឡើងផងដែរ៕