កីឡាករវាយកូនហ្គោលអន្តរជាតិសញ្ជាតិអ៊ីតាលីអាយុ ១៦ឆ្នាំ ឈ្មោះ Emanuele Galeppini ដែលរស់នៅក្នុងទីក្រុង Dubai ប្រទេសអារ៉ាប់រួម នៅថ្ងៃសុក្រ (ទី២ ខែមករា ឆ្នាំ២០២៦) ត្រូវបានគេដាក់ឈ្មោះថា ជាជនរងគ្រោះដំបូងគេ ក្នុងចំណោមជនរងគ្រោះជាច្រើននាក់មកពីប្រទេសអ៊ីតាលី ដែលត្រូវបានកំណត់អត្តសញ្ញាណ បន្ទាប់ពីមានអគ្គិភ័យឆេះរបារ នៅថ្ងៃចូលឆ្នាំសកល នៅឯរមណីយដ្ឋានជិះស្គី ក្នុងទីក្រុង Crans-Montana របស់ប្រទេសស្វីស។

សហព័ន្ធនៃកីឡានេះ បានឲ្យដឹងនៅក្នុងសេចក្តីថ្លែងការណ៍មួយថា៖ «សហព័ន្ធកីឡាវាយកូនហ្គោលអ៊ីតាលី សូមកាន់ទុក្ខ ចំពោះមរណភាពរបស់អត្តពលិកវ័យក្មេង Emanuele Galeppini ដែលបានមានជាប់តាមខ្លួននូវចំណង់ចំណូលចិត្ត និងតម្លៃដ៏ពិតប្រាកដ»។

អាជ្ញាធរស្វីស បានឲ្យដឹងថា មនុស្សប្រហែល ៤០នាក់ បានបាត់បង់ជីវិតនៅក្នុងគ្រោះអគ្គិភ័យនេះ ហើយជាង ១១០នាក់ បានរងរបួស។ អាជ្ញាធរបានប្រាប់ដោយប្រយ័ត្នប្រយែងថា ការបង្ហាញអត្តសញ្ញាណជនរងគ្រោះ ឬការអះអាងចំនួនអ្នកស្លាប់យ៉ាងច្បាស់លាស់ នឹងត្រូវការពេលវេលា ព្រោះសាកសពជាច្រើនត្រូវបានឆេះយ៉ាងធ្ងន់ធ្ងរ។

ឯកអគ្គរដ្ឋទូតអ៊ីតាលីប្រចាំប្រទេសស្វីស បាននិយាយនៅមុននេះថា ជនជាតិអ៊ីតាលីចំនួន ៦នាក់ បានបាត់ខ្លួន និង ១៣នាក់កំពុងសម្រាកនៅមន្ទីរពេទ្យ ដើម្បីព្យាបាលរបួសរបស់ពួកគេ។

កីឡាករ Galepini បាននៅទីក្រុង Crans-Montana ជាមួយគ្រួសាររបស់គេ។ ប្រព័ន្ធផ្សព្វផ្សាយអ៊ីតាលីបានរាយការណ៍ថា រូបគេបានទៅបារ Constellation ជាមួយមិត្តភ័ក្តិ ២នាក់ដែលបានរួចជីវិតពីអគ្គិភ័យនេះ ហើយត្រូវបានបញ្ជូនទៅមន្ទីរពេទ្យ នៅក្បែរនោះ៕