រដ្ឋាភិបាលវ៉េណេស៊ុយអេឡា បានដាក់ប្រទេសក្នុងគ្រាអាសន្ន បន្ទាប់ពីខ្លួនបានចោទប្រកាន់សហរដ្ឋអាមេ រិកថា បានវាយប្រហារទីតាំងស៊ីវិល និងយោធា នៅក្នុងរដ្ឋជាច្រើន នៅព្រឹកថ្ងៃសៅរ៍នេះ។

យ៉ាងហោចណាស់មានការផ្ទុះចំនួន ៧ ដង និងសំឡេងយន្តហោះ ត្រូវបានគេឮ នៅក្នុងរដ្ឋធានីការ៉ាកាស នៅម៉ោងប្រហែល ២ ព្រឹក ម៉ោងក្នុងស្រុក ថ្ងៃសៅរ៍នេះ។

យោងតាមសាក្សីដែលដកស្រង់សម្តីដោយទីភ្នាក់ងារអន្តរជាតិ សំឡេងខ្លាំងៗ និងយន្តហោះហោះទាបៗត្រូវបានគេឮ នៅក្នុងរដ្ឋធានីការ៉ាកាសរបស់ប្រទេសវ៉េណេស៊ុយអេឡា នៅព្រឹកព្រលឹមថ្ងៃនេះ។ តំបន់ភាគខាងត្បូងនៃទីក្រុងនេះ នៅជិតមូលដ្ឋានយោធាដ៏ធំមួយ គឺគ្មានអគ្គិសនីប្រើប្រាស់។

ទូរទស្សន៍ CBS របស់សហរដ្ឋអាមេរិក បានរាយការណ៍ជាលើកដំបូងថា ប្រធានាធិបតីសហរដ្ឋអាមេរិក លោក ដូណាល់ ត្រាំ បានអនុម័តការវាយប្រហារតាមផ្លូវគោកលើប្រទេសវ៉េណេស៊ុយអេឡា រយៈពេលប៉ុន្មានថ្ងៃ មុនការវាយប្រហារនៅព្រឹកថ្ងៃសៅរ៍នេះ៕