អ្នកនាំពាក្យក្រសួងការបរទេសចិននៅថ្ងៃអាទិត្យសប្ដាហ៍នេះ បានអំពាវនាវឱ្យសហរដ្ឋអាមេរិកធានាសុវត្ថិភាពផ្ទាល់ខ្លួនរបស់ប្រធានាធិបតីវ៉េណេស៊ុយអេឡាលោក Nicolás Maduro និងភរិយារបស់លោក និងដោះលែងពួកគេជាបន្ទាន់។

អ្នកនាំពាក្យរូបនេះបាននិយាយថា ខ្លួនមានការព្រួយបារម្ភយ៉ាងខ្លាំងចំពោះការចាប់ខ្លួនលោក Maduro និងភរិយាដោយបង្ខំពីសំណាក់សហរដ្ឋអាមេរិក និងនាំខ្លួនពួកគេចេញពីប្រទេស។

អ្នកនាំពាក្យចិនដដែលបាននិយាយថា សកម្មភាពរបស់សហរដ្ឋអាមេរិកគឺជាការរំលោភយ៉ាងច្បាស់លើច្បាប់អន្តរជាតិ បទដ្ឋានជាមូលដ្ឋានក្នុងទំនាក់ទំនងអន្តរជាតិ និងគោលបំណង និងគោលការណ៍នៃធម្មនុញ្ញអង្គការសហប្រជាជាតិ ដោយជំរុញឱ្យសហរដ្ឋអាមេរិកបញ្ឈប់កិច្ចខិតខំប្រឹងប្រែងដើម្បីផ្តួលរំលំរដ្ឋាភិបាលវ៉េណេស៊ុយអេឡា និងដោះស្រាយជម្លោះតាមរយៈការសន្ទនា និងការចរចា។

កាលពីថ្ងៃសៅរ៍ក្រសួងការបរទេសចិន បានបង្ហាញភាពតក់ស្លត់ និងការថ្កោលទោសយ៉ាងខ្លាំង ប្រឆាំងការប្រើកម្លាំងដោយបើកចំហរបស់អាមេរិក ប្រឆាំងនឹងរដ្ឋដែលមានអធិបតេយ្យភាព និងប្រធានាធិបតីរបស់ប្រទេសវ៉េណេស៊ុយអេឡា៕