ប្រធានាធិបតីអាមេរិក លោក Donald Trump កាលពីថ្ងៃអាទិត្យ (៤ មករា) បានព្រមានខ្លាំងៗថា សហរដ្ឋអាមេរិក អាចនឹងបើកការវាយប្រហារយោធាលើកទីពីរលើប្រទេសវ៉េណេស៊ុយអេឡា បន្ទាប់ពីការចាប់ខ្លួនលោកប្រធានាធិបតី Nicolas Maduro ប្រសិនបើសមាជិករដ្ឋបាលដែលនៅសេសសល់នៅទីនោះ មិនសហការជាមួយកិច្ចខិតខំប្រឹងប្រែងរបស់លោកដើម្បី «ជួសជុល» ប្រទេសនេះ។

សុន្ទរកថារបស់លោក Trump ដែលថ្លែងទៅកាន់អ្នកយកព័ត៌មានលើយន្តហោះ Air Force One បានបង្កើនលទ្ធភាពនៃអន្តរាគមន៍យោធាបន្ថែមទៀតរបស់សហរដ្ឋអាមេរិក នៅអាមេរិកឡាទីន ហើយលោកក៏បានបង្ហើបថា កូឡុំប៊ី និងម៉ិកស៊ិក ក៏អាចប្រឈមនឹងសកម្មភាពយោធាផងដែរ ប្រសិនបើពួកគេមិនកាត់បន្ថយលំហូរគ្រឿងញៀនខុសច្បាប់ទៅកាន់សហរដ្ឋអាមេរិកទេនោះ។

លោក Maduro កំពុងនៅមណ្ឌលឃុំឃាំងមួយក្នុងទីក្រុងញូវយ៉ក រង់ចាំការបង្ហាញខ្លួននៅតុលាការពីបទចោទប្រកាន់ទាក់ទងនឹងគ្រឿងញៀន។ ការចាប់ខ្លួនលោកពីសំណាក់សហរដ្ឋអាមេរិក បានបង្កឱ្យមានភាពមិនប្រាកដប្រជាយ៉ាងខ្លាំង អំពីអ្វីដែលនឹងកើតឡើងបន្ទាប់សម្រាប់ប្រទេសអាមេរិកខាងត្បូងដែលសម្បូរទៅដោយប្រេងមួយនេះ។

លោក Trump បាននិយាយរួចហើយថា រដ្ឋបាលរបស់លោកនឹងធ្វើការជាមួយសមាជិកដែលនៅសេសសល់នៃរបបលោក Maduro ដើម្បីបង្ក្រាបការជួញដូរគ្រឿងញៀន និងរៀបចំឧស្សាហកម្មប្រេងរបស់ប្រទេសនេះឡើងវិញ ជំនួសឱ្យការជំរុញឱ្យមានការបោះឆ្នោតជាបន្ទាន់ដើម្បីដំឡើងរដ្ឋាភិបាលថ្មី៕