ក្រសួងការពារជាតិអង់គ្លេសបាននិយាយថា កងកម្លាំងអាកាសអង់គ្លេស និងបារាំង បានធ្វើប្រតិបត្តិការរួមគ្នាមួយ កាលពីល្ងាចថ្ងៃសៅរ៍ ដើម្បីទម្លាក់គ្រាប់បែកលើកន្លែងលាក់ទុកអាវុធក្រោមដីដែលសង្ស័យថា ធ្លាប់ត្រូវបានប្រើប្រាស់ដោយក្រុមរដ្ឋអ៊ីស្លាម (IS) នៅក្នុងប្រទេសស៊ីរី។

សេចក្តីថ្លែងការណ៍មួយដែលចេញដោយក្រសួងកាលពីយប់ថ្ងៃសៅរ៍ បានឲ្យដឹងថា យន្តហោះរបស់កងទ័ពអាកាសអង់គ្លេស បានកំណត់អត្តសញ្ញាណទីតាំងក្រោមដីមួយ នៅក្នុងតំបន់ភ្នំដែលមានចម្ងាយពីរបីម៉ាយ ភាគខាងជើងនៃទីក្រុងបុរាណ Palmyra ដោយបន្ថែមថា កន្លែងនេះ ទំនងជាត្រូវបានប្រើ ដើម្បីរក្សាទុក     «អាវុធ និងគ្រឿងផ្ទុះ»។

សេចក្តីថ្លែងការណ៍នេះ បានបញ្ជាក់ថា កងកម្លាំងអាកាសអង់គ្លេសបានប្រើប្រាស់គ្រាប់បែកតម្រង់គោលដៅ Paveway IV ដើម្បីកំណត់គោលដៅផ្លូវរូងក្រោមដីមួយចំនួនដែលចុះទៅកន្លែងរក្សាទុកអាវុធនោះ ហើយការចង្អុលបង្ហាញដំបូង គឺថាគោលដៅនេះ ត្រូវបាន «វាយប្រហារដោយជោគជ័យ»។

ក្រសួងបានបន្ថែមថា តំបន់ជុំវិញកន្លែងនោះ «គ្មានលំនៅឋានរបស់ជនស៊ីវិលទេ» ហើយក៏គ្មាន «ការបង្ហាញពីហានិភ័យណាមួយ» ដែលបង្កឡើងដល់ជនស៊ីវិលដោយការវាយប្រហារនោះដែរ៕