កងទ័ពព្រៃឆ្វេងនិយមកូឡុំប៊ីដែលកំពុងប្រតិបត្តិការនៅតាមព្រំដែនជាមួយប្រទេសវ៉េណេស៊ុយអេឡា បានប្តេជ្ញាកាលពីអាទិត្យថា នឹងទប់ទល់នឹង «ផែនការចក្រពត្តិនិយម» របស់ទីក្រុងវ៉ាស៊ីនតោន បន្ទាប់ពីបណ្តេញមេដឹកនាំវ៉េណេស៊ុយអេឡា លោក នីកូឡាស ម៉ាឌូរ៉ូ ចេញពីអំណាចដោយសហរដ្ឋអាមេរិក។

កងទ័ពរំដោះជាតិដ៏មានឥទ្ធិពល (ELN) ដែលគ្រប់គ្រងផ្លូវជួញដូរកូកាអ៊ីនតាមបណ្តោយព្រំដែនកូឡុំប៊ីជាមួយប្រទេសវ៉េណេស៊ុយអេឡា បានអំពាវនាវដល់ «អ្នកស្នេហាជាតិទាំងអស់» ឲ្យតស៊ូប្រឆាំងនឹងផែនការចក្រពត្តិនិយមប្រឆាំងនឹងប្រទេសវ៉េណេស៊ុយអេឡា និងប្រជាជននៃតំបន់កំពុងអភិវឌ្ឍន៍សកលខាងត្បូងសកល»។

អ្នកជំនាញសន្តិសុខនិយាយថា ELN ក៏មានមូលដ្ឋានគាំទ្រយោធា នៅក្នុងប្រទេសវ៉េណេស៊ុយអេឡា ដែលត្រូវបានទទួលស្គាល់ដោយលោក ម៉ាឌូរ៉ូ។

សមាជិកប្រឆាំងនៃកងទ័ពឧទ្ទាម FARC ដែលលែងមានអំណាចហើយនោះ បានប្រជែងជាមួយ ELN ដើម្បីគ្រប់គ្រងតំបន់ផលិតគ្រឿងញៀន នៅជិតប្រទេសវ៉េសណេស៊ុយអេឡា ក៏បានប្តេជ្ញាប្រឆាំងនឹងលោក ត្រាំ ផងដែរ។

ដោយសរសេរនៅលើប្រព័ន្ធផ្សព្វផ្សាយសង្គម X កងទ័ពឧទ្ទាមនេះ បាននិយាយថា ពួកគេបានត្រៀមខ្លួនរួចជាស្រេច ដើម្បីតស៊ូរហូតដល់«ដំណក់ឈាមចុងក្រោយរបស់ពួកគេ ក្នុងការប្រយុទ្ធប្រឆាំងនឹងចក្រភពអាមេរិក»។

ការវាយប្រហារកាលពីថ្ងៃសៅរ៍លើប្រទេសវ៉េណេស៊ុយអេឡា ដើម្បីចាប់ខ្លួនលោក ម៉ាឌូរ៉ូ និងនាំខ្លួនលោក ទៅទីក្រុងញូវយ៉ក ឲ្យប្រឈមមុខនឹងការចោទប្រកាន់ពីជួញដូរបទគ្រឿងញៀន និងអាវុធ បានបង្កើតការភ័យខ្លាច នៅក្នុងប្រទេសកូឡុំប៊ីថា ប្រទេសនេះអាចជាគោលដៅនាពេលអនាគតសម្រាប់ការវាយប្រហាររបស់សហរដ្ឋអាមេរិក៕