សេវាសង្គ្រោះបន្ទាន់បាននិយាយកាលពីថ្ងៃអាទិត្យថា យ៉ាងហោចណាស់មនុស្ស ២៦នាក់ បានលង់ទឹកស្លាប់ និង ១៤នាក់ផ្សេងទៀត កំពុងបាត់ខ្លួន បន្ទាប់ពីទូកមួយគ្រឿងដែលដឹកកសិករ និងអ្នកនេសាទ បានលិច នៅភាគឦសានប្រទេសនីហ្សេរីយ៉ា។

លោក Mohammed Goje នាយកប្រតិបត្តិនៃទីភ្នាក់ងារគ្រប់គ្រងគ្រោះមហន្តរាយរដ្ឋនៅរដ្ឋ Yobe បានប្រាប់សារព័ត៌មាន AFP ថា ហេតុការណ៍នេះ បានកើតឡើង នៅយប់ថ្ងៃសៅរ៍ នៅពេលដែលទូកតូចមួយគ្រឿងដែលដឹកអ្នកដំណើរ ដែលបានធ្វើដំណើរពីរដ្ឋ Jigawa ទៅកាន់រដ្ឋ Yobe បានលិច។

លោកបាននិយាយថា៖«រហូតមកទល់ពេលនេះ អ្នកស្ម័គ្រចិត្តសង្គ្រោះបន្ទាន់ និងក្រុមជួយសង្គ្រោះ បានរកឃើញសាកសពចំនួន ២៦នាក់»។ ទីភ្នាក់ងាររបស់លោក បាននិយាយនៅក្នុងសេចក្តីថ្លែងការណ៍មួយថា មនុស្ស ១៤នាក់ផ្សេងទៀត កំពុងបាត់ខ្លួន៕