ទីផ្សារភាគហ៊ុនអាស៊ី បានមើលឃើញកំណើនយ៉ាងខ្លាំង ប៉ុន្តែតម្លៃប្រេងបែរជាធ្លាក់ចុះយ៉ាងគំហុកនៅថ្ងៃចន្ទ (៥ មករា) នេះ ខណៈវិនិយោគិនកំពុងថ្លឹងថ្លែងលើផលវិបាកនៃសកម្មភាពយោធារបស់សហរដ្ឋអាមេរិក នៅប្រទេសវ៉េណេស៊ុយអេឡា ដើម្បីត្រៀមខ្លួនសម្រាប់សប្តាហ៍ដ៏មមាញឹកនៃការចេញផ្សាយទិន្នន័យសេដ្ឋកិច្ច នៅក្នុងការជួញដូរទីផ្សារដ៏ពេញលេញដំបូងនៃឆ្នាំថ្មីនេះ។

សន្ទស្សន៍ទូលំទូលាយបំផុតរបស់ភាគហ៊ុនអាស៊ីប៉ាស៊ីហ្វិក MSCI ខាងក្រៅប្រទេសជប៉ុន បានកើនឡើងដល់ទៅ ១,២% ខណៈសន្ទស្សន៍ភាគហ៊ុនអេឡិកត្រូនិកខ្នាតតូច S&P 500 របស់អាមេរិកក៏កើនឡើង ០,១%។ ក្នុងចំណោមទីផ្សារភាគហ៊ុនក្នុងតំបន់ សន្ទស្សន៍ Nikkei ជប៉ុន បានកើនឡើង ២,៨% ហើយភាគហ៊ុន Kospi របស់ក្រុមហ៊ុនសេអ៊ូល ភាគហ៊ុននៅប្រទេសចិន និងនៅកោះតៃវ៉ាន់ ក៏បានមើលឃើញកំណត់ត្រាយ៉ាងល្អ។

ចំណែកតម្លៃប្រេងវិញបានធ្លាក់ចុះ ព្រោះការផ្គត់ផ្គង់សកលកំពុងត្រៀមជួបភាពចលាចល បន្ទាប់ពីសហរដ្ឋអាមេរិក ចាប់ខ្លួនមេដឹកនាំវ៉េណេស៊ុយអេឡា Nicolas Maduro នៅក្នុងការវាយឆ្មក់ដ៏គួរឱ្យភ្ញាក់ផ្អើលកាលពីចុងសប្តាហ៍។ សន្ទស្សន៍ប្រេងឆៅ Brent ធ្លាក់ចុះ ២១សេន ឬ ០,៤% មកនៅត្រឹម ៦០,៥៤ដុល្លារ ក្នុងមួយបារ៉ែល គិតត្រឹមម៉ោងសកល ០៤:៥២នាទី ព្រឹកថ្ងៃចន្ទនេះ ខណៈប្រេងឆៅ WTI របស់សហរដ្ឋអាមេរិក ថយចុះ ២៨សេន ឬ ០,៥% មកនៅត្រឹម ៥៧,០៤ដុល្លារ ក្នុងមួយបារ៉ែល។

នាយកគ្រប់គ្រងផ្នែកយុទ្ធសាស្ត្រវិនិយោគនៅស្ថាប័ន OCBC ក្នុងសិង្ហបុរី បាននិយាយថា៖ ដោយសារព្រឹត្តិការណ៍ដែលមិននឹកស្មានដល់នៅវ៉េណេស៊ុយអេឡា នាចុងសប្តាហ៍កន្លងទៅ ទីផ្សារនៅតែរង្គោះរង្គើ និងប្រុងប្រយ័ត្ន ថាតើរដ្ឋបាលលោកប្រធានាធីបតី Donald Trump មានចំណូលចិត្តចំពោះការផ្លាស់ប្តូររបបបន្ថែមទៀតឬអត់ ដូចជានៅអ៊ីរ៉ង់ជាដើម៕