ជើងហោះហើរនៅទូទាំងប្រទេសក្រិក ត្រូវបានចតចោលកាលពីថ្ងៃអាទិត្យ ទី៤ ខែមករា បន្ទាប់ពីការមិនដំណើរនៃប្រេកង់វិទ្យុទាក់ទងដែលបានធ្វើឱ្យរាំងស្ទះដល់ទំនាក់ទំនងចរាចរណ៍ផ្លូវអាកាស បណ្តាលឱ្យអ្នកដំណើររាប់ពាន់នាក់ត្រូវជាប់គាំង និងធ្វើឱ្យប្រតិបត្តិការនៅអាកាសយានដ្ឋានត្រូវផ្អាក។

មានភាពច្បាស់លាស់តិចតួចអំពីអ្វីដែលបណ្តាលឱ្យមានការរំខាននេះ ដែលបានចាប់ផ្តើមកាលពីព្រឹកថ្ងៃអាទិត្យ ហើយបានកើនឡើងយ៉ាងឆាប់រហ័ស។ អាជ្ញាធរអាកាសចរណ៍ស៊ីវិលរបស់ប្រទេសក្រិកបាននិយាយថា ជើងហោះហើរមួយចំនួនឆ្លងកាត់ដែនអាកាសប្រទេសក្រិកនិងតំបន់នៅតែត្រូវបានផ្តល់សេវា ប៉ុន្តែការរឹតបន្តឹងត្រូវបានដាក់ទៅលើប្រតិបត្តិការអាកាសយានដ្ឋានសម្រាប់ហេតុផលសុវត្ថិភាព។

ជើងហោះហើររាប់សិបវ៉ុលត្រូវបានរំខាន។ អ្នកតំណាងនៃសមាគមអ្នកត្រួតពិនិត្យចរាចរណ៍ផ្លូវអាកាសប្រទេសក្រិកបាននិយាយថា បញ្ហានេះហាក់ដូចជាមិនដំណើរការនៃប្រព័ន្ធប្រេកង់វិទ្យុទាក់ទងកណ្តាលនៅប្រព័ន្ធគ្រប់គ្រងតំបន់Athens និងតំបន់ម៉ាសេដូនី ជាទីតាំងគ្រប់គ្រងផ្លូវអាកាសធំបំផុតនៅក្នុងប្រទេស។ 

ឧបករណ៍តាមដានជើងហោះហើរបានបង្ហាញថា ដែនអាកាសប្រទេសក្រិកភាគច្រើនគ្មានជើងហោះហើរទេ។ ប៉ុស្តិ៍ទូរទស្សន៍ក្រិក ERT បានរាយការណ៍ថា ការមកដល់និងចេញដំណើរនៅអាកាសយានដ្ឋានត្រូវបានផ្អាកនៅម៉ោង ៩ ព្រឹក ម៉ោងក្នុងស្រុក ដោយរាយការណ៍ពីស្ថានីយចេញដំណើរនៅអាកាសយានដ្ឋាន Eleftherios Venizelos នៃទីក្រុង Athens ដែលមានអ្នកដំណើរច្រើនកុះករ។