លោកប្រធានាធិបតី Donald Trump កាលពីថ្ងៃអាទិត្យ (ទី៤ ខែមករា ឆ្នាំ២០២៦) បានព្រមានអ៊ីរ៉ង់ថា ប្រទេសនេះនឹងជួបជាមួយវិធានការយ៉ាងខ្លាំងក្លាពីសហរដ្ឋអាមេរិក ប្រសិនបើបាតុករកាន់តែច្រើនឡើងៗ ស្លាប់ក្នុងអំឡុងពេលធ្វើបាតុកម្ម ដែលពេលនេះបានឈានចូលដល់សប្តាហ៍ទី២ ហើយ។

លោក Trump បានប្រាប់អ្នកសារព័ត៌មាននៅលើយន្តហោះ Air Force One ថា៖ «យើងកំពុងតាមដានមើលយ៉ាងយកចិត្តទុកដាក់។ ប្រសិនបើពួកគេចាប់ផ្តើមសម្លាប់មនុស្សដូចដែលពួកគេធ្លាប់បានធ្វើ កាលពីអតីតកាល ខ្ញុំគិតថា ពួកគេនឹងជួបជាមួយការមានវិធានការយ៉ាងខ្លាំងក្លាពីសហរដ្ឋអាមេរិក»។

គួរបញ្ជាក់ថា ការតវ៉ា ដែលបង្កឡើងដោយសារវិបត្តិការចំណាយលើតម្លៃនៃការរស់នៅ បានចាប់ផ្តើមជាមួយនឹងកូដកម្មរបស់ម្ចាស់ហាង ក្នុងទីក្រុងតេអេរ៉ង់ កាលពីថ្ងៃទី២៨ ខែធ្នូ ឆ្នាំ២០២៥។ ហើយបើយោងតាមចំនួនដែលផ្អែកលើរបាយការណ៍ផ្លូវការ បានបង្ហាញថា យ៉ាងហោចណាស់មនុស្ស ១២នាក់ ក្នុងនោះរួមមានទាំងសមាជិកនៃកងកម្លាំងសន្តិសុខផងដែរ បានបាត់បង់ជីវិត ចាប់តាំងពីពេលនោះមក។

បាតុកម្មនេះ គឺធំបំផុតនៅក្នុងប្រទេសអ៊ីរ៉ង់ ចាប់តាំងពីមានចលនាតវ៉ាឆ្នាំ ២០២២-២០២៣ ដែលបង្កឡើងដោយការស្លាប់អំឡុងពេលស្ថិតនៅក្រោមការឃុំឃាំងរបស់នាង Mahsa Amini ដែលត្រូវបានចាប់ខ្លួនពីបទរំលោភលើច្បាប់ស្លៀកសំលៀកបំពាក់ដ៏តឹងរឹងរបស់អ៊ីរ៉ង់ សម្រាប់ស្ត្រី៕