បើយោងតាមអាជ្ញាធរប្រព័ន្ធផ្សព្វផ្សាយអ៊ីស្រាអែល KAN បានឲ្យដឹងថា កាលពីថ្ងៃអាទិត្យ (ទី៤ ខែមករា ឆ្នាំ២០២៦) អ៊ីស្រាអែលបានចាប់ផ្តើមដកហូតអាជ្ញាប័ណ្ណប្រតិបត្តិការរបស់អង្គការអន្តរជាតិចំនួន ៣៧ ដែលផ្តល់ជំនួយមនុស្សធម៌ដល់តំបន់ហ្កាហ្សាស្ទ្រីប ដោយបានផ្ដល់ហេតុផលថា ស្ថាប័នទាំងនោះ មិនបានបំពេញតាមការតម្រូវក្រោមច្បាប់ចុះឈ្មោះថ្មី។

កាលពីថ្ងៃអង្គារសប្ដាហ៍កន្លងមក រដ្ឋាភិបាលអ៊ីស្រាអែលបានចាប់ផ្តើមផ្ញើការជូនដំណឹងផ្លូវការទៅកាន់អង្គការអន្តរជាតិរាប់សិប ដែលប្រាប់ដល់ស្ថាប័នទាំងនោះថា អាជ្ញាប័ណ្ណរបស់ពួកគេ នឹងត្រូវលុប ចាប់ពីខែមករា ឆ្នាំ២០២៦ តទៅ ហើយតម្រូវឲ្យបញ្ចប់សកម្មភាពរបស់ពួកគេទាំងអស់ នៅខែមីនាឆ្នាំដដែលនេះ។

ប្រព័ន្ធផ្សព្វផ្សាយនោះ បានឲ្យដឹងថា៖ «បន្ទាប់ពីមានការចូលជាធរមាននូវយន្តការចុះឈ្មោះ សម្រាប់អង្គការអន្តរជាតិ នៅតំបន់ហ្កាហ្សា ដំណើរការនៃការរហាមឃាត់អង្គការអន្តរជាតិចំនួន ៣៧ មិនឲ្យមានប្រតិបត្តិការ បានចាប់ផ្តើមហើយ»។ ហើយអ៊ីស្រាអែលអះអាងថា «អង្គការទាំងនេះ បានផ្ទេរជារួមមិនដល់ ១ភាគរយផងនូវជំនួយមនុស្សធម៌សរុប ពេញមួយសង្រ្គាមនេះ ហើយថា វិសាលភាពនៃជំនួយ នឹងមិនរងផលប៉ះពាល់ដោយការសម្រេចនេះឡើយ»។

ជាមួយគ្នានេះ ប្រព័ន្ធផ្សព្វផ្សាយនេះ បានអះអាងបន្ថែមថា ការស៊ើបអង្កេតផ្នែកសន្តិសុខ បានបង្ហាញពីការពាក់ព័ន្ធរបស់និយោជិតមកពីអង្គការគ្រូពេទ្យគ្មានព្រំដែន នៅក្នុង «សកម្មភាពភេរវករ» ដោយចោទប្រកាន់ថា នៅក្នុងករណីសំខាន់២ អង្គការនេះបានរក្សាទុកព័ត៌មានទាំងស្រុង អំពីអត្តសញ្ញាណ និងតួនាទីរបស់បុគ្គលិកខ្លួន។

តែយ៉ាងណាក្ដី យោងតាមសារព័ត៌មានចុះផ្សាយប្រចាំថ្ងៃរបស់អ៊ីស្រាអែល Haaretz បានឲ្យដឹងថា ការសម្រេចរបស់អ៊ីស្រាអែល កាលពីខែវិច្ឆិកាឆ្នាំកន្លងទៅ ក្នុងការដកហូតអាជ្ញាប័ណ្ណរបស់អង្គការជំនួយអន្តរជាតិ គឺផ្អែកលើហេតុផលនយោបាយសុទ្ធសាធ៕