កាលពីឆ្នាំ២០២០ ក្រសួងយុត្តិធម៌អាមេរិក បានធ្វើរឿងមួយដែលស្ទើរតែមិនធ្លាប់ឮពីមុនមក ដោយបានចោទប្រកាន់ប្រធានាធិបតីកំពុងកាន់អំណាចនៃប្រទេសបរទេសមួយ គឺមេដឹកនាំវ៉េណេស៊ុយអេឡា លោក Nicolás Maduro ប៉ុន្តែជំហានដែលកាន់តែមិនធម្មតាជាងនេះទៅទៀត គឺបទចោទទាំងអស់នោះត្រូវបានចោទប្រកាន់ផ្លូវការម្ដងទៀតកាលចុងសប្តាហ៍កន្លងទៅ ដើមឆ្នាំ២០២៦ នេះ។ ក្រុមអ្នកជំនាញផ្នែកច្បាប់ បាននិយាយថា បទចោទប្រកាន់ទាំងអស់នោះ អាចធ្វើឱ្យលោក Maduro ប្រឈមមុខនឹងការជាប់ពន្ធនាគារអស់មួយជីវិតនៅក្នុងសហរដ្ឋអាមេរិក។

គួរឱ្យដឹងថា លោក Maduro និងភរិយារបស់លោក គឺលោកស្រី Cilia Flores ត្រូវបានកងកម្លាំងពិសេសអាមេរិក ចាប់ខ្លួនក្នុងការវាយឆ្មក់លើទីក្រុងការ៉ាកាស នាថ្ងៃសៅរ៍ចុងសប្ដាហ៍មុន រួចបញ្ចូនអ្នកទាំងពីរតាមយន្តហោះទៅកាន់ទីក្រុងញូវយ៉ក និងដាក់ពន្ធនាគារ។ ឥស្សរជនវ៉េណេស៊ុយអេឡាទាំងពីររូបបានផ្ដល់ចម្លើយពីភាពគ្មានទោសក្នុងតុលាការអាមេរិក កាលពីថ្ងៃចន្ទ (៥ មករា) ខណៈលោក Maduro អះអាងថា លោកត្រូវបានគេ «ចាប់ជំរិត»។

សំណួរជាច្រើនត្រូវបានលើកឡើងអំពីភាពស្របច្បាប់នៃការចាប់ខ្លួននេះ។ ក្រុមអ្នករិះគន់លោក Trump បានកត់សម្គាល់ថា កាលពីមួយខែមុន លោកទើបតែលើកលែងទោសដល់អតីតប្រធានាធិបតីហុងឌុយរ៉ាស Juan Orlando Hernandez ដែលត្រូវកាត់ទោសឱ្យជាប់ពន្ធនាគារ ៤៥ឆ្នាំ ពីបទនាំចូលកូកាអ៊ីនជាង ៤០០តោន។

ប៉ុន្តែក្រុមអ្នកជំនាញផ្នែកច្បាប់និយាយថា បទព្រហ្មទណ្ឌប្រឆាំងនឹងលោក Maduro គឺរឹងមាំ និងខ្លាំងក្លាជាងនោះ ហើយមេដឹកនាំដ៏យូរអង្វែងរូបនេះ អាចចំណាយពេលពេញមួយជីវិតរបស់លោក នៅក្នុងពន្ធនាគារអាមេរិក ខណៈអ្នកជំនាញផ្សេងទៀតបានលើកឡើងថា ការជាប់ពន្ធនាគារនោះអាចនឹងមានរយៈពេលយ៉ាងតិចក៏រាប់សិបឆ្នាំដែរ។ លោក Neama Rahmani ប្រធានក្រុមហ៊ុនមេធាវី West Coast នៅសហរដ្ឋអាមេរិក និងជាអតីតរដ្ឋអាជ្ញាសហព័ន្ធ បាននិយាយថា ការចោទប្រកាន់ខ្លះដែលបានដាក់ទៅលើខ្លួនលោក Maduro មានការកាត់ទោសអប្បបរមា ២០ឆ្នាំ និងខ្លះទៀតដល់ទៅ ៣០ឆ្នាំ នៅក្រោមច្បាប់សហព័ន្ធរបស់អាមេរិក៕