ទិដ្ឋភាពក្នុងអង្គប្រជុំរបស់អង្គការសហប្រជាជាតិ (UN) នៅសហរដ្ឋអាមេរិក កាលពីថ្ងៃចន្ទ (៥ មករា) បានពោរពេញទៅដោយភាពតានតឹង ដោយទាំងសម្ព័ន្ធមិត្ត និងសត្រូវរបស់ទីក្រុងវ៉ាស៊ីនតោន បានប្រើប្រាស់កិច្ចប្រជុំបន្ទាន់របស់ក្រុមប្រឹក្សាសន្តិសុខ ដើម្បីសម្តែងការជំទាស់ចំពោះប្រតិបត្តិការយោធានៅវ៉េណេស៊ុយអេឡា ដែលបានចាប់ខ្លួនមេដឹកនាំ លោក Nicolás Maduro ខណៈដែលអាមេរិក បាននិយាយការពារសកម្មភាពរបស់ខ្លួន។

នៅចំពោះមុខស្ថាប័នដ៏មានអំណាចបំផុតរបស់ UN ប្រទេសនានាបានរិះគន់អន្តរាគមន៍របស់ទីក្រុងវ៉ាស៊ីនតោន ក្នុងប្រទេសអាមេរិកខាងត្បូងមួយនេះ និងវោហាសាស្រ្តផ្សេងទៀតដែលបង្ហាញពីលទ្ធភាពពង្រីកសកម្មភាពយោធាទៅប្រទេសដទៃដូចជាកូឡុំប៊ី និងម៉ិកស៊ិក ជុំវិញការចោទប្រកាន់គ្រឿងញៀន។

ខណៈដែលប្រធានាធិបតីបារាំង Emmanuel Macron ថ្មីៗនេះ បានគាំទ្រការចាប់ខ្លួននោះ តំណាង UN របស់ប្រទេសនេះ បែរជាបានរិះគន់ខ្លាំងជាងគេក្នុងកិច្ចប្រជុំកាលពីថ្ងៃចន្ទ ដោយហៅសកម្មភាពនោះថា បំផ្លាញ «មូលដ្ឋានគ្រឹះនៃសណ្តាប់ធ្នាប់អន្តរជាតិ»។ ឯកអគ្គរដ្ឋទូតរុស្ស៊ី វិញបានរិះគន់ថា អាមេរិក កំពុងតាំងខ្លួនឯងថាជា "ចៅក្រមតុលាការកំពូល"។ ក្រៅប្រទេសសមាជិក អគ្គលេខាធិការអង្គការសហប្រជាជាតិផ្ទាល់គឺលោក Antonio Guterres ក៏បានសម្ដែងក្ដីបារម្ភយ៉ាងខ្លាំងថា ច្បាប់អន្តរជាតិមិនត្រូវបានគោរព ទាក់ទងនឹងសកម្មភាពយោធាថ្ងៃទី៣ ខែមករានោះ។

យ៉ាងណាមិញ លោក Mike Waltz បេសកជនសហរដ្ឋអាមេរិក បានការពារប្រតិបត្តិការនៅវ៉េណេស៊ុយអេឡា ថាជាប្រតិបត្តិការអនុវត្តច្បាប់យ៉ាងយុត្តធម៌បំផុត និងជា «ប្រតិបត្តិការវះកាត់» ដោយបានរិះគន់ខ្លាំងៗបកទៅវិញ លើក្រុមប្រឹក្សាដែលមានសមាជិក ១៥រូបនេះ ចំពោះការមិនពេញចិត្តលើការចាប់ខ្លួនមេដឹកនាំវ៉េណេស៊ុយអេឡារូបនោះ៕