លោក Pete Hegseth ប្រធានមន្ទីរបញ្ចកោណរបស់ទីក្រុងវ៉ាស៊ីនតោន បាននិយាយកាលពីថ្ងៃចន្ទ (៥ មករា) ថា បុគ្គលិកយោធារបស់សហរដ្ឋអាមេរិកជិត ២០០នាក់ បានចូលទៅក្នុងរដ្ឋធានីការ៉ាកាស នៃប្រទេសវ៉េណេស៊ុយអេឡា ក្នុងផ្នែកមួយនៃប្រតិបត្តិការចាប់ខ្លួនមេដឹកនាំរបស់ប្រទេសអាមេរិកខាងត្បូងមួយនេះ គឺលោក Nicolas Maduro កាលពីចុងសប្ដាហ៍កន្លងទៅ។

គួរឱ្យដឹងថា កងកម្លាំងអាមេរិក បានចាប់ខ្លួនលោក Maduro និងភរិយារបស់លោគ កាលពីថ្ងៃសៅរ៍ ទី៣ ខែមករា ឆ្នាំ២០២៦ ដោយបញ្ចប់ការគ្រប់គ្រងរយៈពេល ១២ឆ្នាំដោយមេដឹកនាំឆ្វេងនិយមរូបនេះ ដែលទីក្រុងវ៉ាស៊ីនតោន បានចោទប្រកាន់ពីបទដឹកនាំក្រុមជួញដូរគ្រឿងញៀន និងត្រូវបានកំណត់គោលដៅ ដោយប្រាក់រង្វាន់ចាប់ខ្លួនចំនួន ៥០លានដុល្លារអាមេរិក។

ក្នុងសុន្ទរកថាមួយទៅកាន់បុគ្គលិកសាងសង់នាវាអាមេរិក នៅរដ្ឋ Virginia លោករដ្ឋមន្រ្តីការពារជាតិ Hegseth បាននិយាយថា «ជនជាតិអាមេរិកដ៏អស្ចារ្យបំផុតជិត ២០០នាក់ បានចូលទៅក្នុងទីក្រុងការ៉ាកាស… ហើយបានចាប់ខ្លួនបុគ្គលដែលត្រូវបានចោទប្រកាន់ពីបទព្រហ្មទណ្ឌ ដែលតុលាការអាមេរិកចង់បាន ដើម្បីគាំទ្រដល់ការអនុវត្តច្បាប់ ដោយពុំមានជនជាតិអាមេរិកណាម្នាក់ត្រូវបានសម្លាប់ឡើយ»។

នេះជាលើកដំបូងហើយ ដែលមន្ត្រីអាមេរិកម្នាក់បានផ្តល់តួលេខសម្រាប់កងកម្លាំងអាមេរិក ដែលបានហោះចូលទៅប្រតិបត្តិការក្នុងទីក្រុងការ៉ាកាស តាមរយៈឧទ្ធម្ភាគចក្រ ជាផ្នែកមួយនៃប្រតិបត្តិការដ៏គួរឱ្យភ្ញាក់ផ្អើលនេះ ដែលក៏ពាក់ព័ន្ធនឹងយន្តហោះយោធាជាង ១៥០គ្រឿង ក្នុងតួនាទីផ្សេងៗគ្នា រួមទាំងការវាយប្រហារលើប្រព័ន្ធការពារជាតិវ៉េណេស៊ុយអេឡា ផងដែរ៕