រដ្ឋមន្ត្រីការបរទេសស៊ីរី លោក Asaad Hassan Al-Shaibani និងប្រធាននាយកដ្ឋានស៊ើបការណ៍សម្ងាត់ទូទៅ លោក Hussein Al-Salameh បានដឹកនាំគណៈប្រតិភូមួយក្រុម ក្នុងការចរចាជាមួយអ៊ីស្រាអែល ដែលត្រូវបានជួយ និងសម្របសម្រួលដោយសហរដ្ឋអាមេរិក។

ប្រភពមួយពីរដ្ឋាភិបាលស៊ីរីបានបញ្ជាក់កាលពីថ្ងៃចន្ទថា ការបន្តការចរចាជាមួយអ៊ីស្រាអែលឡើងវិញនេះ បញ្ជាក់ពីការប្តេជ្ញាចិត្តយ៉ាងមុតមាំរបស់ស៊ីរី ក្នុងការស្តារសិទ្ធិជាតិដែលមិនអាចចរចាបានរបស់ខ្លួន។

យោងតាមទីភ្នាក់ងារសារព័ត៌មានអារ៉ាប់ស៊ីរី ការពិភាក្សាទាំងនេះ បានផ្តោតជាចម្បងលើការធ្វើឲ្យដំណើរការឡើងវិញនូវកិច្ចព្រមព្រៀងបញ្ចប់សង្គ្រាមឆ្នាំ ១៩៧៤ ដើម្បីធានាថា កងកម្លាំងអ៊ីស្រាអែលដកថយទៅខ្សែបន្ទាត់ មុនថ្ងៃទី ០៨ ខែធ្នូ ឆ្នាំ ២០២៤។

ប្រភពដដែលបានបន្ថែមថា នេះនឹងជាផ្នែកមួយនៃកិច្ចព្រមព្រៀងសន្តិសុខ ដែលធានាអធិបតេយ្យភាពស៊ីរី និងទប់ស្កាត់ការជ្រៀតជ្រែកក្នុងកិច្ចការផ្ទៃក្នុងរបស់ខ្លួន។

បន្ទាប់ពីការដួលរលំនៃរបបរបស់លោក បាសា អាល់អាសាដ និងការផ្លាស់ប្តូរអំណាចនៅទីក្រុងដាម៉ាស ក្នុងខែធ្នូ កងកម្លាំងអ៊ីស្រាអែលបានចូលទៅក្នុងតំបន់ទ្រនាប់គ្មានយោធា ដែលបង្កើតឡើងក្នុងឆ្នាំ ១៩៧៤។ ពួកគេក៏បានធ្វើការវាយប្រហារតាមអាកាសរាប់រយដង ការវាយឆ្មក់ដោយកងទ័ពជើងគោក និងបង្កើតចំណុចត្រួតពិនិត្យនៅក្នុងទឹកដីស៊ីរី ក្បែរទីក្រុង Quneitra៕