ប្រធានាធិបតីកូរ៉េខាងត្បូង លោក Lee Jae Myung បានអំពាវនាវឱ្យមាន «ដំណាក់កាលថ្មី» នៅក្នុងទំនាក់ទំនងជាមួយប្រទេសចិន ខណៈលោកបានបើកកិច្ចប្រជុំកំពូលជាមួយមេដឹកនាំចិន លោក Xi Jinping នៅទីក្រុងប៉េកាំង កាលពីថ្ងៃចន្ទដើមសប្ដាហ៍នេះ។

សន្តិសុខក្នុងតំបន់ និងការដកបម្រាមក្រៅផ្លូវការរបស់ទីក្រុងប៉េកាំង លើវប្បធម៌ប៉ុបកូរ៉េ គឺជារបៀបវារៈចម្បងរបស់លោក Lee ខណៈលោកបន្តដំណើរទស្សនកិច្ចរយៈពេល ៤ថ្ងៃនៅក្នុងប្រទេសចិន។ លោកក៏គ្រោងនឹងជួបជាមួយនាយករដ្ឋមន្ត្រីចិន លោក Li Qiang និងប្រធានសភា Zhao Leji នៅថ្ងៃអង្គារ ទី៦ ខែមករា នេះផងដែរ។ នេះគឺជាដំណើរទស្សនកិច្ចលើកដំបូងហើយរបស់មេដឹកនាំកូរ៉េខាងត្បូង ចាប់តាំងពីឆ្នាំ២០១៩មក។

ទន្ទឹមនឹងនេះ លោក Xi ក៏បានបង្ហាញពីបំណងចង់ពង្រឹងទំនាក់ទំនងជាមួយកូរ៉េខាងត្បូង ស្របពេលមានជម្លោះការទូតរវាងចិន និងជប៉ុន។ កូរ៉េខាងត្បូងគឺជាសម្ព័ន្ធមិត្តសន្តិសុខរបស់សហរដ្ឋអាមេរិក - ដូចជប៉ុនដែរ - ប៉ុន្តែក៏ពឹងផ្អែកលើប្រទេសចិន សម្រាប់ពាណិជ្ជកម្ម។ ក្រុមអ្នកជំនាញនិយាយថា លោក Lee ត្រូវបានរំពឹងថា នឹងបន្តឈរក្នុងជំហរការទូតដ៏តានតឹងរវាងទីក្រុងប៉េកាំង និងទីក្រុងតូក្យូ។

ការចុះផ្សាយរបស់កាសែតកូរ៉េខាងត្បូង Chosun បានឱ្យដឹងថា ក្នុងជំនួបកាលពីថ្ងៃចន្ទនោះ លោក Lee បានថ្លែងថា ដំណើរទស្សនកិច្ចនេះគឺជា «ឱកាសដ៏សំខាន់មួយ» សម្រាប់ «ការស្តារឡើងវិញនូវទំនាក់ទំនងកូរ៉េខាងត្បូង-ចិន យ៉ាងពេញលេញ» ហើយថា «ទីក្រុងសេអ៊ូល ចង់បើកដំណាក់កាលថ្មីមួយក្នុងការអភិវឌ្ឍទំនាក់ទំនងកូរ៉េខាងត្បូង-ចិន»៕