នៅថ្ងៃអង្គារនេះ ប្រធានាធិបតីកូរ៉េខាងត្បូងលោក Lee Jae Myung បានជួបពិភាក្សាការងារជាមួយនាយករដ្ឋមន្រ្តីចិនលោក Li Qiang និងប្រធានសភាប្រជាជាតិចិនលោក Zhao Leji នៅក្នុងទីក្រុងប៉េកាំង ។

អំឡុងជំនួបជាមួយលោក Li លោក Leeកត់សំគាល់ឃើញថា នេះគឺជាជំនួបលើកទី ៣ហើយរបស់ពួកគេ បន្ទាប់ពីជំនួបនៅកិច្ចប្រជុំកំពូលក្រុមប្រទេសមានឧស្សាហកម្មរីកលូតលាស់ G20 និងកិច្ចប្រជុំកំពូលក្រុមប្រទេស APEC កាលពីឆ្នាំមុន ហើយលោកនិយាយថា លោក Liមានអារម្មណ៍ថា ដូចជាមិត្តជិតស្និតខ្លាំង ។

នៅក្នុងជំនួបមួយទៀតជាមួយលោក Zhao លោក Lee និយាយថា លោកយល់ថា លោក Zhao បានដើរតួយ៉ាងសំខាន់សម្រាប់ដំណើរទស្សនកិច្ចរបស់ក្រុមមន្រ្តីកូរ៉េខាងត្បូងផ្សេងទៀត ទៅកាន់ប្រទេសចិន មុនដំណើរទស្សនកិច្ចផ្លូវរដ្ឋរបស់លោក ។

លោក Lee បានជួបពិភាក្សាការងារជាមួយប្រធានាធិបតីចិនលោក Xi Jinpingផងដែរនៅព្រឹកថ្ងៃចន្ទ ដែលជាផ្នែកមួយនៃដំណើរទស្សនកិច្ចផ្លូវរដ្ឋលើកដំបូងរបស់លោក ទៅកាន់ប្រទេសចិន ចាប់តំាងពីរូបលោកឡើងកាន់អំណាចកាលពីខែមិថុនា ។

យោងតាមការចុះផ្សាយរបស់ទូរទស្សន៍ចិន និងកូរ៉េខាងត្បូង បានឲ្យដឹងថា ប្រទេសទាំង ២ បានចុះហត្ថលេខាលើកិច្ចព្រមព្រៀងចំនួន ១៥ នៅក្នុងជំនួបកំពូលនេះ រួមទាំងកិច្ចព្រមព្រៀងបច្ចេកវិទ្យា កម្មសិទ្ធិបញ្ញា និងកិច្ចសហប្រតិបត្តិការដឹកជញ្ជូន ៕