ក្រុមមន្ត្រី នៅថ្ងៃអង្គារ (ទី៦ ខែមករា ឆ្នាំ២០២៦) នេះ បានប្រាប់ឲ្យដឹងថា បម្រាមគោចរត្រូវបានដាក់ នៅទីក្រុងព្រំដែនដ៏សំខាន់មួយ នៅភាគខាងត្បូងនសប្រទេសនេប៉ាល់ បន្ទាប់ពីក្រុមអ្នកកាន់សាសនាហិណ្ឌូ និងឥស្លាម បានចាប់ផ្តើមតវ៉ាប្រឆាំងនឹងគ្នាទៅវិញទៅមក បន្ទាប់ពីមានការបំផ្លិចបំផ្លាញវិហារឥស្លាម កាលពីចុងសប្តាហ៍សប្ហាហ៍កន្លងមក។

បទបញ្ជាបម្រាមគោចរដែលចេញដោយរដ្ឋបាលតំបន់ Parsa បានឲ្យដឹងថា គ្មាននរណាម្នាក់នឹងត្រូវបានអនុញ្ញាតឲ្យនៅតាមដងផ្លូវនោះទេ ហើយការប្រមូលផ្តុំ និងបាតុកម្មទាំងអស់ ត្រូវបានហាមឃាត់។ សេចក្តីជូនដំណឹងនេះ ក៏បានព្រមានផងដែរថា អ្នកបំពានអាចត្រូវបានបាញ់ប្រហារដោយកងកម្លាំងសន្តិសុខ។

ទាហាន និងនគរបាលប្រដាប់អាវុធ កំពុងដើរល្បាតតាមដងផ្លូវនានានៃទីក្រុង Birgunj ដែលស្ថិតនៅចម្ងាយ ១៣០គីឡូម៉ែត្រ នៅភាគខាងត្បូងនៃរដ្ឋធានី Kathmandu ដែលជាចំណុចព្រំដែនដ៏សំខាន់ សម្រាប់ការនាំចូលប្រេង ទំនិញ និងការផ្គត់ផ្គង់ជាច្រើនពីប្រទេសជិតខាងឥណ្ឌាមកកាន់នេប៉ាល់។

ក្រុមអ្នកកាន់សាសនាឥស្លាម បានចាប់ផ្តើមធ្វើការតវ៉ានៅតាមដងផ្លូវនៃទីក្រុង Birgunj កាលពីថ្ងៃអាទិត្យចុងសប្ដាហ៍កន្លងទៅ ប្រឆាំងនឹងទង្វើបំផ្លិចបំផ្លាញនិយមលើវិហារឥស្លាម នៅក្នុងទីក្រុងក្បែរនោះ ដែលត្រូវបានបន្តមកដោយបាតុកម្មដាច់ដោយឡែកពីអ្នកកាន់សាសនាហិណ្ឌូ នៅថ្ងៃតែមួយ។ ការតវ៉ាបានបន្តមានតាំងពីពេលនោះមក។ មិនមានការប៉ះទង្គិចគ្នា រវាងក្រុមទាំង២ នោះទេ ហើយក៏មិនមានអ្នករងរបួសអ្វីធ្ងន់ធ្ងរដែរ ដោយមានត្រឹមតែការប៉ះទង្គិចគ្នាជាមួយនគរបាលកុបកម្មប៉ុណ្ណោះ។

គួរបញ្ជាក់ថា ការប៉ះទង្គិចគ្នា រវាងអ្នកកាន់សាសនាហិណ្ឌូ និងឥស្លាម គឺកម្រកើតមានណាស់ នៅប្រទេសនេប៉ាល់ដែលមានបិរិស័ទហិណ្ឌូភាគច្រើន ដោយប្រជាជនមូស្លីមត្រូវបានឃើញភាគច្រើនតាមតំបន់ព្រំដែន នៅភាគខាងត្បូងនៃប្រទេសនេះ៕