យោងតាមគេហទំព័រក្រសួងការបរទេសទីក្រុងវ៉ាស៊ីនតោន នៅថ្ងៃអង្គារ (៦ មករា) បានឱ្យដឹងថា រដ្ឋបាលរបស់លោកប្រធានាធិបតីអាមេរិក Donald Trump បានដាក់ប្រជាជាតិចំនួន ២៥ប្រទេស បន្ថែមទៀត នៅក្នុងបញ្ជីប្រទេសដែលពលរដ្ឋរបស់ពួកគេអាចនឹងត្រូវតម្រូវឱ្យដាក់ប្រាក់តម្កល់ធានា រហូតដល់ ១៥.០០០ដុល្លារអាមេរិក ដើម្បីដាក់ពាក្យស្នើសុំទិដ្ឋាការចូលទៅកាន់ទឹកដីសហរដ្ឋអាមេរិក។

បញ្ជីនេះ ភាគច្រើនរួមបញ្ចូលប្រទេសមកពីទ្វីបអាហ្វ្រិក អាមេរិកឡាទីន និងអាស៊ីខាងត្បូង។ គិតត្រឹមថ្ងៃអង្គារសប្ដាហ៍នេះ បញ្ជីនោះមានប្រទេសសរុបចំនួន ៣៨ប្រទេស។ គេហទំព័ររបស់ក្រសួងការបរទេស បាននិយាយថា គោលនយោបាយសម្រាប់ប្រទេសដែលទើបបន្ថែមថ្មីនេះ នឹងចូលជាធរមាននៅថ្ងៃទី២១ ខែមករា ឆ្នាំ២០២៦ ខាងមុខ។

វ៉េណេស៊ុយអេឡា ក៏ត្រូវបានបញ្ចូលក្នុងបញ្ជីនេះដែរ បន្ទាប់ពីមេដឹកនាំដែលត្រូវបានផ្ដួលរំលំរបស់ខ្លួន គឺលោក Nicolas Maduro ត្រូវកងកម្លាំងអាមេរិក ចាប់ខ្លួនកាលពីចុងសប្តាហ៍កន្លងទៅ ហើយនាំទៅកាន់ទីក្រុងញូវយ៉ក។ រដ្ឋាភិបាលអាមេរិក បាននិយាយថា ប្រាក់តម្កល់ទាំងនេះមានបំណងរារាំងភ្ញៀវទេសចរ មិនឱ្យស្នាក់នៅហួសទិដ្ឋាការរបស់ពួកគេ ដែលសម្រាប់គោលបំណងទេសចរណ៍ ឬអាជីវកម្ម។

គេហទំព័រក្រសួងការបរទេសអាមេរិក បាននិយាយថា «ពលរដ្ឋ ឬជនជាតិណាម្នាក់ ដែលធ្វើដំណើរប្រើលិខិតឆ្លងដែន ចេញដោយប្រទេសមួយក្នុងចំណោមប្រទេសទាំងនេះ ដែលត្រូវបានរកឃើញថា មានសិទ្ធិទទួលបានទិដ្ឋាការប្រភេទ B1/B2 ត្រូវតែដាក់ប្រាក់ធានាចំនួន ៥.០០០ដុល្លារ ១០.០០០ដុល្លារ ឬ ១៥.០០០ដុល្លារ» ដោយបន្ថែមថា ចំនួនទឹកប្រាក់នឹងត្រូវបានកំណត់នៅពេលសម្ភាសន៍ទិដ្ឋាការ៕