ការិយាល័យនាយករដ្ឋមន្ត្រីអ៊ីស្រាអែល បាននិយាយកាលពីថ្ងៃអង្គារថា អ៊ីស្រាអែល និងស៊ីរី បានបន្តកិច្ចពិភាក្សាឡើងវិញ ដែលមានគោលបំណងបន្ធូរបន្ថយភាពតានតឹងតាមបណ្តោយព្រំដែនរួមរបស់ពួកគេ បន្ទាប់ពីការផ្អាកអស់រយៈពេលជាច្រើនខែ ខណៈដែលការចរចាជុំថ្មី បានចាប់ផ្តើមនៅទីក្រុងប៉ារីស។

នៅក្នុងសេចក្តីថ្លែងការណ៍មួយ ការិយាល័យនេះ បានអះអាងថា ការសន្ទនាកំពុងត្រូវបានសម្របសម្រួលដោយសហរដ្ឋអាមេរិក។ អ៊ីស្រាអែលបាននិយាយថា ភាគីទាំងពីរបានយល់ព្រមបន្តកិច្ចពិភាក្សា «ដើម្បីជំរុញគោលបំណងរួម និងការពារសន្តិសុខរបស់ជនជាតិភាគតិចដ្រូស (Druze) នៅក្នុងប្រទេសស៊ីរី»។

ក្រោយមក ក្រសួងការបរទេសសហរដ្ឋអាមេរិកបានចេញសេចក្តីថ្លែងការណ៍រួមគ្នា ជាមួយស៊ីរី និងអ៊ីស្រាអែល ដោយនិយាយថា ភាគីទាំងពីរបានយល់ព្រមបង្កើត «យន្តការបញ្ចូលគ្នារួមគ្នា» ដែលជាក្រុមទំនាក់ទំនងជាក់លាក់មួយ ដើម្បីឲ្យមានការសម្របសម្រួលជាបន្តបន្ទាប់លើការចែករំលែកព័ត៌មានស៊ើបការណ៍សម្ងាត់ ការកាត់បន្ថយភាពតានតឹងយោធា ការចូលរួមការទូត និងឱកាសពាណិជ្ជកម្ម ក្រោមការត្រួត       ពិនិត្យរបស់សហរដ្ឋអាមេរិក។

ទីភ្នាក់ងារសារព័ត៌មាន SANA របស់រដ្ឋស៊ីរី បាននិយាយថា ការពិភាក្សាទាំងនេះ ផ្តោតលើការបង្កើតឡើងវិញនូវតំបន់ទ្រនាប់ដែលត្រួតពិនិត្យដោយអង្គការសហប្រជាជាតិរវាងកងកម្លាំងស៊ីរី និងអ៊ីស្រាអែល នៅលើតំបន់ខ្ពង់រាប Golan Heights ដូចដែលបានកំណត់នៅក្នុងកិច្ចព្រមព្រៀងបញ្ចប់សង្គ្រាមឆ្នាំ ១៩៧៤និងការដកទ័ពរបស់អ៊ីស្រាអែលទៅកាន់ទីតាំងដែលកាន់កាប់នៅមុនថ្ងៃទី ០៨ ខែធ្នូ ឆ្នាំ ២០២៤។ សេចក្តីថ្លែងការណ៍រួម មិនបានសំដៅទៅលើតំបន់ទ្រនាប់នោះទេ៕