ប្រមុខការទូតចិន លោក វ៉ាង យី បានចាប់ផ្តើមដំណើរទស្សនកិច្ចប្រចាំឆ្នាំរបស់លោកនៅទ្វីបអាហ្វ្រិក នាថ្ងៃពុធ (៧ មករា) នេះ ដោយផ្តោតលើភាគខាងកើតដែលមានសារៈសំខាន់ខាងយុទ្ធសាស្ត្រ ខណៈមហាអំណាចសេដ្ឋកិច្ចលំដាប់ទី២ របស់ពិភពលោកមួយនេះ កំពុងព្យាយាមពង្រឹងឥទ្ធិពលរបស់ខ្លួនលើទ្វីបអាហ្វ្រិក។ ក្នុងដំណើរទស្សនកិច្ចនៅឆ្នាំថ្មីនេះ លោករដ្ឋមន្ត្រីការបរទេស វ៉ាង យី នឹងទៅកាន់ប្រទេសអេត្យូពី សូម៉ាលី តង់ហ្សានី និងឡេសូតូ។

ដំណើររបស់លោក វ៉ាង ទៅកាន់សូម៉ាលី — ដែលជាទស្សនកិច្ចលើកដំបូងរបស់រដ្ឋមន្ត្រីការបរទេសចិន ចាប់តាំងពីទសវត្សរ៍ឆ្នាំ១៩៨០មក — ទំនងជានឹងផ្តល់ឱ្យទីក្រុងម៉ូហ្កាឌីស្យូ នូវការជំរុញផ្នែកការទូត បន្ទាប់ពីអ៊ីស្រាអែល កាលពីខែមុន បានក្លាយជាប្រទេសដំបូងគេដែលទទួលស្គាល់តំបន់ផ្ដាច់ខ្លួន Somaliland ភាគខាងជើង ដែលបានប្រកាសឯករាជ្យនៅឆ្នាំ១៩៩១។

គោលដៅបន្ទាប់នៅចុងភាគខាងត្បូងគឺតង់ហ្សានី ដែលជាចំណុចសំខាន់នៃការជំរុញរបស់ទីក្រុងប៉េកាំង ដើម្បីធានាការចូលទៅកាន់តំបន់រ៉ែទង់ដែងដ៏ធំសម្បើមរបស់ទ្វីបអាហ្វ្រិក។ នៅឡេសូតូវិញ តាមរយៈទស្សនកិច្ចទៅកាន់រាជាណាចក្រអាហ្វ្រិកភាគខាងត្បូងមួយនេះ លោក វ៉ាង មានបំណងបញ្ជាក់ពីការជំរុញរបស់ទីក្រុងប៉េកាំង ថាជាជើងឯកនៃពាណិជ្ជកម្មសេរី។ កាលពីឆ្នាំមុន ចិនបានផ្តល់សិទ្ធិចូលទីផ្សារដោយមិនគិតពន្ធ ដល់សេដ្ឋកិច្ចទំហំ ១៩សែនកោដិដុល្លាររបស់ខ្លួន ទៅដល់ប្រទេសក្រីក្របំផុតលើពិភពលោកមួយនេះ។

ឡេសូតូ ជាប្រទេសមួយក្នុងចំណោមប្រទេសក្រីក្របំផុតក្នុងពិភពលោក ដែលមានផលិតផលក្នុងស្រុកសរុប GDP តែជាង ២ពាន់លានដុល្លារប៉ុណ្ណោះ ហើយប្រទេសនេះស្ថិតក្នុងចំណោមប្រជាជាតិដែលរងផលប៉ះពាល់ខ្លាំងបំផុតដោយពន្ធដ៏លើសលប់របស់អាមេរិកកាលពីឆ្នាំមុន រហូតដល់ ៥០% លើការនាំចេញរបស់ខ្លួនទៅកាន់សហរដ្ឋអាមេរិក៕