ប្រធានាធិបតីបារាំង លោក អេម៉ានុយអែល ម៉ាក្រុង ( Emmanuel Macron) បានបញ្ជាក់យ៉ាងច្បាស់ថា លោកមានគម្រោងធ្វើការសន្ទនាជាមួយមេដឹកនាំរុស្ស៊ី លោក វ្ល៉ាឌីមៀ ពូទីន (Vladimir Putin) ឲ្យបានឆាប់តាមដែលអាចធ្វើទៅបាន។

លោកបានថ្លែងនៅក្នុងបទសម្ភាសន៍ជាមួយទូរទស្សន៍ France 2 ថា៖«អ្វីៗគ្រប់យ៉ាងត្រូវតែរៀបចំឡើងក្នុងរយៈពេលខ្លី។ ទំនាក់ទំនងកំពុងត្រូវបានស្តារឡើងវិញ ហើយគួរតែធ្វើឡើងនៅក្នុងសប្តាហ៍ខាងមុខ» ដោយសង្កត់ធ្ងន់ថា ការសន្ទនាត្រូវតែធ្វើឡើង «ឲ្យបានឆាប់តាមដែលអាចធ្វើទៅបាន»។

លោក ម៉ាក្រុង បានឆ្លើយសំណួរមួយពីអ្នកសារព័ត៌មានរបស់ទូរទស្សន៍នេះ ដែលបានរំលឹកឡើងវិញនូវសេចក្តីថ្លែងការណ៍ថ្មីៗរបស់ប្រធានាធិបតីបារាំងថា វានឹងមានប្រយោជន៍ក្នុងការនិយាយជាមួយលោក ពូទីន និងបានសាកសួរអំពីវឌ្ឍនភាពណាមួយក្នុងរឿងនេះ។

នាពេលថ្មីៗនេះ រដ្ឋមន្ត្រីការបរទេសរុស្ស៊ី លោក សឺហ្គេ ឡាវរ៉ូវ (Sergey Lavrov) បាននិយាយថា ប្រសិនបើលោក ម៉ាក្រុង មានឆន្ទៈក្នុងការនិយាយ រុស្ស៊ីតែងតែបើកចំហសម្រាប់ការពិភាក្សា។ អ្នកនាំពាក្យវិមានក្រឹមឡាំង លោក Dmitry Peskov បានកត់សម្គាល់ថា វិមានក្រឹមឡាំង នឹងជូនដំណឹងដល់លោក ប្រសិនបើខ្លួនទទួលបានសំណើសម្រាប់ការសន្ទនារវាងមេដឹកនាំរុស្ស៊ី និងបារាំង៕