ប្រធានាធិបតីកូរ៉េខាងត្បូង លោក Lee Jae Myung បាននិយាយទៅកាន់ប្រព័ន្ធផ្សព្វផ្សាយកូរ៉េខាងត្បូង នៅទីក្រុងសៀងហៃ ក្នុងថ្ងៃពុធ (៧ មករា) នេះថា វឌ្ឍនភាពជាច្រើនត្រូវបានធ្វើឡើងក្នុងការស្តារទំនុកចិត្តឡើងវិញជាមួយទីក្រុងប៉េកាំង ហើយថា លោកស្នើឱ្យប្រធានាធិបតីចិន លោក Xi Jinping ដើរតួនាទីសម្របសម្រួលក្នុងកិច្ចប្រឹងប្រែងរបស់ទីក្រុងសេអ៊ូល ក្នុងការប្រាស្រ័យទាក់ទងជាមួយកូរ៉េខាងជើង។

លោក Lee ដែលជួបពិភាក្សាជាមួយលោក Xi ក្នុងសប្តាហ៍នេះ បាននិយាយថា មេដឹកនាំចិនបានកត់សម្គាល់ថា ការអត់ធ្មត់គឺត្រូវការជាចាំបាច់ ក្នុងកិច្ចពិភាក្សាពីកូរ៉េខាងជើង ដែលមានអាវុធនុយក្លេអ៊ែរ។

លោក Lee បានបន្តថា លោកបានបើកបង្ហាញពីកិច្ចប្រឹងប្រែងរបស់កូរ៉េខាងត្បូង ក្នុងកិច្ចពិភាក្សាជាមួយសមភាគីចិន ដែលទីក្រុងសេអ៊ូល បានខិតខំដើម្បីចូលរួមជាមួយកូរ៉េខាងជើង ទាំងក្នុងការសន្ទនា និងកែលម្អទំនាក់ទំនង ហើយបានស្នើឱ្យលោក Xi ដើរតួនាទីសម្របសម្រួលសន្តិភាពនៅលើឧបទ្វីបកូរ៉េ។

មេដឹកនាំកូរ៉េខាងត្បូងរូបនេះ បានស្វះស្វែងបើក «ដំណាក់កាលថ្មី» ក្នុងទំនាក់ទំនងជាមួយចិន បន្ទាប់ពីភាពត្រជាក់ស្រេបអស់ជាច្រើនឆ្នាំ ជាមួយនឹងការនាំចេញផ្នែកវប្បធម៌ដ៏ពេញនិយមរបស់កូរ៉េខាងត្បូង ត្រូវបានបិទចេញពីទីផ្សារចិន ដោយសារតែជម្លោះជុំវិញការដាក់ពង្រាយប្រព័ន្ធការពារមីស៊ីលរបស់អាមេរិក នៅកូរ៉េខាងត្បូង ក្នុងឆ្នាំ២០១៧៕