កងកម្លាំងសន្តិសុខអ៊ីរ៉ង់ កាលពីថ្ងៃអង្គារ (ទី៦ ខែមករា ឆ្នាំ២០២៦) បានបាញ់ឧស្ម័នបង្ហូរទឹកភ្នែក ដើម្បីបំបែកហ្វូងបាតុករ នៅឯផ្សារទីក្រុងតេអេរ៉ង់ ខណៈដែលអង្គការក្រៅរដ្ឋាភិបាលមួយ បានប្រាប់ឲ្យដឹងថា មនុស្សជាង ២០នាក់ ត្រូវបានសម្លាប់នៅក្នុងការបង្ក្រាបលើការតវ៉ាដ៏ធំបំផុត ដែលកើតមាននៅសាធារណរដ្ឋឥស្លាមជាលើកដំបូង ក្នុងរយៈពេល ៣ឆ្នាំ។

ការតវ៉ាត្រូវបានបង្កឡើងដោយសារការមានកំហឹង ចំពោះការចំណាយនៃការរស់នៅ ដោយរូបិយប័ណ្ណរបស់អ៊ីរ៉ង់ បានធ្លាក់តម្លៃ កាលពីថ្ងៃអង្គារ ដែលធ្លាក់ចុះដល់កម្រិតទាបមួយផ្សេងទៀត ធៀបនឹងរូបិយប័ណ្ណបរទេស។

បើយោងតាមអង្គការសិទ្ធិមនុស្សអ៊ីរ៉ង់ (IHR) ដែលមានមូលដ្ឋាន នៅប្រទេសន័រវ៉ែស បានឲ្យដឹងថា កងកម្លាំងសន្តិសុខអ៊ីរ៉ង់ ឥឡូវនេះ បានសម្លាប់បាតុករយ៉ាងហោចណាស់ ២៧នាក់ រួមទាំងអនីតិជន ៥នាក់ដែលមានអាយុក្រោម ១៨ឆ្នាំ បន្ទាប់ពីមានបាតុកម្មរយៈពេល ១០ថ្ងៃដែលបានចាប់ផ្តើមនៅចុងខែធ្នូឆ្នាំមុន។

រលកនៃការតវ៉ានេះ បានចាប់ផ្តើមនៅថ្ងៃទី២៨ ខែធ្នូ ឆ្នាំ២០២៥ ដោយឈ្មួញ បានបិទផ្សារ នៅទីក្រុងតេអេរ៉ង់ ដែលជាមជ្ឈមណ្ឌលសេដ្ឋកិច្ចជាតិ។ ចាប់តាំងពីពេលនោះមក ការតវ៉ាបានរីករាលដាលទៅកាន់តំបន់ផ្សេងទៀត ជាពិសេសនៅភាគខាងលិច ដែលជាទីរស់នៅរបស់ក្រុមជនជាតិភាគតិចឃឺដ និង Lor (ឡរ)៕