ប្រព័ន្ធផ្សព្វផ្សាយ នៅកោះតៃវ៉ាន់ បានរាយការណ៍ថា យន្តហោះចម្បាំង F-16 របស់កងទ័ពអាកាសតៃវ៉ាន់ បានធ្លាក់កាលពីថ្ងៃអង្គារ (ទី៦ ខែមករា ឆ្នាំ២០២៦)។

ប្រព័ន្ធផ្សព្វផ្សាយតៃវ៉ាន់ UDN បានរាយការណ៍ថា យន្តហោះចម្បាំងមួយកៅអី F-16 ពីមូលដ្ឋានទ័ពអាកាស ក្នុងទីក្រុង Hualien បានចេញដំណើរ សម្រាប់ «បេសកកម្មហ្វឹកហ្វឺនធម្មតា» នៅម៉ោងប្រហែល ៦ល្ងាច (ម៉ោងក្នុងស្រុក) ប៉ុន្តែហាក់ជាបានដាច់ការទាក់ទងចម្ងាយប្រហែល ១០ម៉ាយល៍ណត់ (ជាង ១៨គីឡូម៉ែត្រ) នៅភាគខាងកើតនៃទីប្រជុំជន Fengbin នៃទីក្រុង Hualien នៅម៉ោង ៧:២៩យប់ (ម៉ោងក្នុងស្រុក) ដោយអ្នកបើកបរបានលោតចេញ។

បើយោងតាមសារព័ត៌មាន UDN បានឲ្យដឹងថា កិច្ចប្រឹងប្រែងជួយសង្គ្រោះកំពុងដំណើរការ ប៉ុន្តែលក្ខខណ្ឌអាកាសធាតុមិនល្អ និងការមើលឃើញមិនសូវច្បាស់ល្អ នាពេលយប់ អាចធ្វើឲ្យមានការលំបាកកាន់តែខ្លាំងឡើង។ 

ហើយបើយោងតាមសារព័ត៌មាន Focus Taiwan ដែលជាប្រព័ន្ធផ្សព្វផ្សាយមួយផ្សេងទៀតនៅលើកោះនេះ បានឲ្យដឹងថា យន្តហោះដែលធ្លាក់នោះ គឺជាយន្តហោះប្រភេទ F-16V (Block 20)។

គួរបញ្ជាក់ថា នេះមិនមែនជាលើកទី១ នោះទេ ដែលយន្តហោះ F-16V របស់កងទ័ពអាកាសកោះតៃវ៉ាន់ បានធ្លាក់។ បើយោងតាមការចុះផ្សាយរបស់សារព័ត៌មាន Focus Taiwan នាពេលនោះ បានឲ្យដឹងថា កាលពីខែមករា ឆ្នាំ២០២២ យន្តហោះ F-16V បានធ្លាក់ចូលទឹកនៅឆ្នេរភាគខាងលិចរបស់កោះ ដែលបានបណ្ដាលឲ្យអ្នកបើកយន្តហោះតែម្នាក់គត់ស្លាប់៕