យោងតាមទីភ្នាក់ងារសារព័ត៌មានផ្លូវការ IRNA ប្រមុខកងទ័ពអ៊ីរ៉ង់បានព្រមានកាលពីថ្ងៃពុធ ៧មករាសប្ដាហ៍នេះ ថា ប្រទេសនេះនឹងឆ្លើយតបប្រសិនបើវោហារសាស្ត្រអរិភាពពីសំណាក់សត្រូវរបស់ខ្លួននៅតែបន្ត។

មេបញ្ជាការកងទ័ពអ៊ីរ៉ង់ លោក Amir Hatami បាននិយាយថា អ៊ីរ៉ង់ចាត់ទុកការកើនឡើងនៃភាសាអរិភាពប្រឆាំងនឹងប្រទេសអ៊ីរ៉ង់ថាជាការគំរាមកំហែង ហើយនឹងមិនអនុញ្ញាតឱ្យវាគ្មានចម្លើយឡើយ។

ប្រធានាធិបតីអាមេរិក លោក Donald Trump បានធ្វើអត្ថាធិប្បាយពីរដងក្នុងរយៈពេលប៉ុន្មានថ្ងៃថ្មីៗនេះលើការតវ៉ាដែលកំពុងបន្តនៅទូទាំងប្រទេសអ៊ីរ៉ង់ ដោយអះអាងថា សហរដ្ឋអាមេរិកនឹងចាត់វិធានការ ប្រសិនបើអ៊ីរ៉ង់ សម្លាប់អ្នកតវ៉ាដោយសន្តិវិធី។ 

ក្រុមសិទ្ធិមនុស្សនិយាយថា មនុស្សយ៉ាងហោចណាស់២៥នាក់ស្លាប់ ក្នុងការតវ៉ា នៅប្រទេសអ៊ីរ៉ង់។

ជាការឆ្លើយតប រដ្ឋមន្ត្រីការបរទេសអ៊ីរ៉ង់ លោក Seyed Abbas Araghchi បាននិយាយកាលពីថ្ងៃពុធសប្ដាហ៍នេះដែរ ថាកិច្ចការផ្ទៃក្នុងរបស់អ៊ីរ៉ង់ទាក់ទងនឹងតែប្រជាជនរបស់ខ្លួនប៉ុណ្ណោះ ដោយកត់សម្គាល់ថា រដ្ឋាភិបាល និងប្រជាពលរដ្ឋ កំពុងចូលរួមក្នុងការសន្ទនា។

លោក Hatami បានសង្កត់ធ្ងន់ថា កងកម្លាំងប្រដាប់អាវុធអ៊ីរ៉ង់ស្ថិតក្នុងស្ថានភាពត្រៀមខ្លួនជាស្រេចពេញលេញ ដោយព្រមានថា ការគណនាខុសណាមួយដោយសត្រូវ នឹងបង្កឱ្យមានការឆ្លើយតបដ៏ម៉ឺងម៉ាត់ជាងសកម្មភាពរបស់អ៊ីរ៉ង់ក្នុងអំឡុងសង្គ្រាម១២ ថ្ងៃក្នុងខែមិថុនា ២០២៥ទៅទៀត៕