ប្រធានាធិបតីអ៊ុយក្រែន លោក Volodymyr Zelenskyy កាលពីថ្ងៃពុធ (៧ មករា) បានជំរុញឱ្យមានវឌ្ឍនភាពកាន់តែខ្លាំងលើកិច្ចចរចាចូលជាសមាជិករបស់សហភាពអឺរ៉ុប សម្រាប់ទីក្រុងគីវ ហើយក៏បានអំពាវនាវឱ្យសម្ព័ន្ធមិត្តរបស់ខ្លួន បង្កើតការធានាសន្តិសុខដ៏រឹងមាំប្រឆាំងនឹងការវាយប្រហារឡើងវិញណាមួយរបស់រុស្ស៊ី និងទណ្ឌកម្មកាន់តែតឹងរ៉ឹងលើទីក្រុងមូស្គូ។

លោក Zelenskyy បានជួបជាមួយប្រធានាធិបតីស៊ីប លោក Nikos Christodoulides នៅទីក្រុងនីកូស៊ី និងមេដឹកនាំជាន់ខ្ពស់ផ្សេងទៀតរបស់ប្លុក ខណៈប្រទេសស៊ីប ចូលកាន់តំណែងជាប្រធានប្តូរវេនរបស់សហភាពអឺរ៉ុប ដែលមានរយៈពេល ៦ខែ។ ស៊ីប — ដែលមានទំនាក់ទំនងនយោបាយ និងវប្បធម៌ជិតស្និទ្ធជាប្រពៃណីជាមួយរុស្ស៊ី — បានគាំទ្រយ៉ាងពេញទំហឹងចំពោះទណ្ឌកម្មលើទីក្រុងមូស្គូ។

ក្នុងសេចក្តីថ្លែងការណ៍មួយបន្ទាប់ពីកិច្ចប្រជុំ លោក Zelenskyy បាននិយាយថា “ភាគីទាំងពីរកំពុងខិតខំធ្វើការដើម្បីសម្រេចបានវឌ្ឍនភាព ឱ្យច្រើនតាមដែលអាចធ្វើទៅបានក្នុងអំឡុងពេលនេះ លើការបើកកិច្ចចរចាជាបន្តបន្ទាប់ និងការចូលជាសមាជិកសហភាពអឺរ៉ុប របស់អ៊ុយក្រែន”។

អ៊ុយក្រែន បានដាក់ពាក្យស្នើសុំចូលរួមជាមួយប្លុកអឺរ៉ុប ក្នុងឆ្នាំ២០២២ ពោលគឺ រយៈពេលប៉ុន្មានថ្ងៃប៉ុណ្ណោះបន្ទាប់ពីរុស្ស៊ី បើកប្រតិបត្តិការយធាទ្រង់ទ្រាយធំរបស់ខ្លួនក្នុងខែកុម្ភៈ នៅឆ្នាំដដែលនោះ ដោយទីក្រុងគីវ ចង់ភ្ជាប់ចំណងខាងនយោបាយ និងសេដ្ឋកិច្ចទៅនឹងលោកខាងលិច។ អ៊ុយក្រែន បានជំរុញឱ្យមានវឌ្ឍនភាពលើជំហាននេះ ទោះបីជាសង្គ្រាមនៅតែក្ដៅគគុក ប៉ុន្ទែបានជួបនឹងការប្រឆាំងយ៉ាងខ្លាំងក្លាពីប្រទេសសមាជិកប្លុកអឺរ៉ុប ហុងគ្រី ចំពោះដំណើរការនេះ៕