កាលពីថ្ងៃពុធ (៧ មករា) លោកប្រធានាធិបតី Donald Trump បាននិយាយថា ថវិកាយោធាសហរដ្ឋអាមេរិក សម្រាប់ឆ្នាំ២០២៧ គួរតែមានចំនួន ១,៥ សែនកោដិដុល្លារ នៅក្នុងតួលេខដ៏ខ្ពស់ជាងចំនួន ៩០១ពាន់លានដុល្លារ បច្ចុប្បន្ន ដែលត្រូវបានអនុម័តដោយសភាសម្រាប់ឆ្នាំ២០២៦នេះ។

ការបង្កើនណាមួយនៃថវិកាយោធាបែបនេះ នឹងតម្រូវឱ្យមានការអនុញ្ញាតពីសភា ដែលអាចនាំឱ្យមានបញ្ហាប្រឈមដ៏ឈឺក្បាលមួយ ខណៈសមាជិកបក្សសាធារណរដ្ឋរបស់លោក Trump មានសំឡេងភាគច្រើនយ៉ាងស្ដួចស្ដើងបំផុត ទាំងក្នុងព្រឹទ្ធសភា និងសភាតំណាងរាស្ត្រសហរដ្ឋអាមេរិក។

ក្នុងសារមួយនៅលើបណ្ដាញសង្គម លោក Trump បាននិយាយថា លោកបានធ្វើការសម្រេចចិត្តលើការចំណាយលើយោធាឆ្នាំ២០២៧ ដ៏ច្រើនលើសលប់នោះ «បន្ទាប់ពីការចរចាដ៏យូរ និងលំបាក ជាមួយព្រឹទ្ធសមាជិក សមាជិកសភា រដ្ឋមន្រ្តី និងអ្នកតំណាងនយោបាយផ្សេងទៀត ជាពិសេសនៅក្នុងពេលវេលាដ៏លំបាក និងគ្រោះថ្នាក់ទាំងនេះ»។

ទើបតែប៉ុន្មានថ្ងៃចុងក្រោយនេះ កងកម្លាំងអាមេរិក បានចាប់ខ្លួនប្រធានាធិបតីវ៉េណេស៊ុយអេឡា Nicolas Maduro ចេញពីប្រទេសរបស់លោក ដោយផ្តួលរំលំមេដឹកនាំរូបនេះចេញពីអំណាច។ សេតវិមានក៏និយាយថា លោក Trump កំពុងពិភាក្សាពីជម្រើសសម្រាប់យកកោះ Greenland មកគ្រប់គ្រង រួមទាំងលទ្ធភាពប្រើប្រាស់យោធាអាមេរិកផងដែរ។ លើសពីនេះ លោក Trump បានដាក់ពង្រាយកងកម្លាំង ដើម្បីត្រួតពិនិត្យសុវត្ថិភាពទីក្រុងមួយចំនួននៅទូទាំងសហរដ្ឋអាមេរិក៕